O vento, ausente no primeiro día do Trofeo Hotel Carlos I Silgar

Non puido ser. A décimo novena edición do Trofeo Hotel Carlos I Silgar - 31ª Regata Ruta das Illas tivo que atrasarse pola ausencia de vento. Desta forma, espérase que as condicións meteorolóxicas deste venres, a que sería a segunda xornada, sexan mellores para poder saír á mar.

As altas temperaturas foron as grandes protagonistas da xornada e a ausencia de vento xogou unha mala pasada ás tripulacións que fronte a Sanxenxo esperaban o bocinazo de saída da decimonovena edición do Trofeo Hotel Carlos I Silgar (trixésima primeira edición da Regata Ruta das Illas), que neste 2018 volve ser campionato galego de Cruceiros por concesión da Real Federación Galega de Vela.

E é que a compoñente meteorolóxica viuse minguada debido ás altas temperaturas reinantes na ría de Pontevedra, que nalgunhas localidades da súa rivera chegou a alcanzar os 39-40 graos. Este efecto afogaba as pequenas brisas que intentaban aflorar ao longo da tarde. Pero a súa intensidade era excesivamente escasa, impedindo a navegación a vela, evitando polo tanto que os barcos puidesen saír a navegar. Desta forma, os participantes quedaron co mel nos beizos no que podería ser unha xornada idílica.

Tras este primeiro día, as espadas quedan no alto con dúas xornadas aínda por diante onde todo está por decidir para a trintena de embarcacións inscritas nesta cita de alto nivel que é campionato galego de Cruceiros ORC, e que está organizada polo Real Club Náutico de Sanxenxo e o Hotel Carlos I Silgar, coa colaboración de Deporte Galego da Xunta de Galicia; a Deputación de Pontevedra; a concellaría de deportes do Concello de Sanxenxo: Nauta Sanxenxo e a Real Federación Galega de Vela.

RECEPCIÓN. Os armadores e os equipos acudiron á recepción que o Hotel Carlos I Silgar ofreceu a todos os participantes, á espera de que na tarde deste sábado a compoñente meteorolóxica poida ofrecer o atractivo de circunnavegar as illas de Onza e Ons, un dos trazados tradicionais desta regata.

O acto serviu para esquecer o mal sabor de boca que se lles quedou aos participantes por non poder competir por mor da ausencia de vento. Pero ademais, tamén axudou a que os participantes compartisen experiencias e coñecésense máis.

En principio, a saída de hoxe está prevista para as 13.00 horas. Espérase que esta vez si aparezan os ventos para axudar a navegar a estas embarcacións, que cabe recordar que están divididas en catro clases (ORC 1, ORC 2, ORC 3 e ORC 4) segundo o tamaño. Ademais, espérase que esta xornada, moito máis técnica da que estaba preparada para o venres, sexa practicamente decisiva.