Jesús Ramos: "Viuse a un Pontevedra de dúas caras, pero tivemos opcións"

O ADESTRADOR do Pontevedra, Jesús Ramos, afirmou que este domingo na Raíña Sofía víronse "dúas caras" da súa escuadra na derrota ante Unionistas (1-0): "Non é que entraramos mal ao partido, aínda que nos empezaron a facer ocasións e a danarnos por dentro nalgunha situación. Intentámolo corrixir, pero nunha xogada de saque de banda gañáronnos as costas e fíxose o penalti. Na segunda parte si fomos capaces de xerar moito máis xogo en campo contrario, tivemos as nosas opcións, pero non as metemos e ímonos para casa con cero puntos".

O técnico marinense recoñeceu que a acción da pena máxima en contra era unha das que se traballaron durante a semana: "Xa sabiamos que os saques de banda de Unionistas están moi ben adestrados", asegurou o preparador, en dúbida logo dos cinco encontros seguidos que acumula o seu equipo sen gañar en liga: "Durante os primeiros quince minutos vin ao Pontevedra metido, gañando segundos balóns. Unionistas ten bos futbolistas. Nos últimos quince (da primeira parte) foi cando nos fixeron máis dano, con ocasións bastante claras".

Para terminar, Jesús Ramos falou de superar a derrota e pensar no seguinte encontro: "O vestiario está amolado. Viñamos aquí coa ilusión de sacar os tres puntos e non fomos capaces. Isto é fútbol, estas cousas pasan. Temos que seguir de pé e continuar traballando porque o sábado temos unha nova oportunidade contra o Celta B".

O conxunto da Boa Vila medirase, deste xeito, ante un rival que non xogou este fin de semana e que se sitúa cun punto máis na táboa (cun partido menos).

HERNÁN PÉREZ. Para o adestrador do Unionistas, Hernán Pérez, a vitoria ante o Pontevedra vale o seu peso en ouro: "Sabiamos que gañar aquí era un triunfo de catro puntos: tres que che dá a Federación por vencer e outro da diferenza de goles co rival. Sigo contando co Pontevedra para que estea a pelexar polas primeiras posicións".

O técnico asturiano eloxiou o traballo dos seus pupilos: "Saímos moi ben, a morder e a presionar en campo contrario. Puxémonos por diante nunha situación dun penalti claro. Na segunda parte as cousas cambiaron. O rival é un moi bo equipo, viño a por nós e xerounos dificultades. Estamos nesa dinámica positiva na que, cando xa non che alcanza co xogo, sálvanche cousas como a parada de Miguel Serna ou a fortuna do gol cantado que se lles vai ao traveseiro".

Pérez recoñeceu que o cadro charro sufriu nos segundos 45 minutos: "O Pontevedra ten un moi bo equipo, independentemente de que acabase cun xogador menos. Somos un persoal bastante mozo e aínda non sabemos defender en situacións de tensión ou de presión. Estamos a aprender ás alancadas. Que veña un rival así ao teu estadio e fágache sufrir é o normal".