A volta ao céspede, no limbo

O inicio da pretemporada do Pontevedra Club de Fútbol segue no limbo. O club tiña previsto regresar aos adestramentos este martes, pero as poucas certezas en canto aos protocolos sanitarios e a ausencia dunha data concreta de inicio de liga freou esta idea.

A día de hoxe, o PCF mantense á espera. Desde a entidade pontevedresa esperábase que a reunión da Real Federación Española de Fútbol coas territoriais aclarase o panorama. Pero nada máis lonxe da realidade. Aínda que a RFEF aclarou que non ten intención de pospor a liga ata 2021, tampouco concretou unha posible data de inicio. Tan só destacou que sería "o máis pronto posible" e supeditou este reinicio das súas competicións á posta en marcha dun protocolo sanitario promocionado polas autoridades deportivas e sanitarias estatais.

Non hai unha data prevista para o regreso aos campos, pero todo apunta a que non levará a cabo nos próximos días

Neste sentido, o Pontevedra agarda á publicación do documento de procedementos hixiénicos e sanitarios para ter máis claro a que aterse. O equipo podería empezar a funcionar seguindo o protocolo da Federación Galega de Fútbol, pero enténdese como medida máis coherente esperar novidades con respecto ao regulamento nacional. Esta decisión apóiase, ademais, na ausencia de présa por comezar a adestrar nun momento no que se descoñece o momento exacto do inicio das competicións. A intención do club é a de realizar unha pretempada longa, pero tampouco excesiva. Sobre todo, tendo en conta que a día hoxe non existe a posibilidade de levar a cabo sesións grupais e que tampouco se poden celebrar partidos amigables en terras galegas.

Así mesmo, dar o pistoletazo de saída á precampaña suporía pór en marcha o armazón xurídico-laboral con respecto aos xogadores nun escenario con, polo momento, demasiadas incertezas.

Os xogadores pasaron recoñecementos médicos, con proba PCR incluída, e foron covocados o pasado luns a Pasarón

Precisamente os futbolistas acudiron na tarde-noite do pasado luns ás instalacións de Pasarón para ter unha primeira toma de contacto co corpo técnico e o resto do persoal da entidade da Boa Vila. Nese encontro explicóuselles a situación e apelouse á tranquilidade.

Polo momento, os futbolistas mantéñense xa que logo á espera de novas notificacións por parte do PCF, que lles realizou durante os últimos días un primeiro recoñecemento médico, xa que se contaba con comezar o martes a adestrar. Dentro desas probas incluíuse a realización de test PCR a todo o persoal e o staff para dirimir se estaban contaxiados por coronavirus.

NON A CURTO PRAZO. Agora, o Pontevedra estuda as novas posibilidades e reformula as súas planificacións. En principio, non hai unha data de inicio no horizonte e parece que a volta ao céspede non se producirá nun curto prazo de tempo. Pero todo pode cambiar dun día a outro.

O martes, o club estaba convocado á reunión que convocou a Futgal cos equipos de categoría nacional para informarlles da reunión que Rafael Louzán mantivo con Luís Rubiales e o resto de presidentes territoriais.