Yelco dá vida o Alondras no minuto 96

Mantense viva a esperanza do ascenso do Alondras despois de que Yelco anotase un golazo no minuto 96 que supuxo o 1-2. O conxunto do Morrazo sufriu a súa primeira derrota nesta fase de ascenso e terá que remontar. Adiantáronse os visitantes ao bordo do descanso por medio de Bonilla, que volveu marcar superada a hora de partido. Aitor Díaz puido recortar diferenzas no minuto 92, pero finalmente sería Yelco quen anotase o único tanto branquivermello cunha espectacular volea.

Tras uns minutos de tenteo, foi o Alondras o que conseguiu facerse co control do balón, aínda que sufriu para atopar espazos entre as liñas visitantes. A primeira ocasión do partido foi para o conxunto branquivermello: no minuto oito, un centro de Champi rematouno de forma acrobática Jonás e Medavilla tivo que estirarse para atrapar o esférico.

O Portugalete mantíñase firme sen balón e, cando non atopaba unha saída fácil desde atrás, buscaba o xogo directo cun Bonilla moi activo e poderoso no xogo de costas.

O cadro portugalujo avisou seriamente do seu perigo no minuto 40. Foi o preludio do 0-1, que chegou xusto ao fío do descanso. Axel rematou no corazón da área un centro desde a esquerda e Agujetas conseguiu despexar baixo paus, pero o balón quedou morto e Bonilla só tivo que empuxalo ao fondo da portería.

O golpe non pareceu afectar o plan do Alondras, que levou a iniciativa nos primeiros minutos do segundo tempo e acumulou tímidas chegadas ben resoltas pola zaga do Portugalete. No 62, unha boa combinación entre Champi e Pablo García pola esquerda terminou cun centro do lateral ao que non puido chegar Álex Rei. Un minuto máis tarde, o Portu montou un contragolpe letal para que Bonilla acabase empuxando o balón en boca de gol.

Xa no 92, un córner botado por Yahvé acaboulle chegando a Aitor Díaz, pero non conseguiu contactar ben co balón. Quen non perdoou foi Yelco, que anotou o definitivo 1-2 tras outra acción a balón parado: saque de banda de Yahvé, bloqueo de Jonás na área para permitir a asistencia coa cabeza dun Aitor Díaz que sempre se apunta nos momentos importantes e volea antolóxica á escuadra de Yelco sobre a bucina. O soño segue vivo.