Abanca presenta en Asturias e León o seu novo modelo de oficinas

O presidente e o conselleiro delegado de Abanca, Juan Carlos Escotet e Francisco Botas, respectivamente, presentaron esta tarde aos clientes de León e Oviedo o novo modelo de oficina que a entidade financeira está a incorporar na súa rede comercial.

As reformas realizadas nas oficinas principais de Abanca están deseñadas para mellorar a calidade de servizo ao cliente a través de solucións tecnolóxicas de última xeración, amplos espazos abertos (non hai mostradores nin despachos) e zonas diferenciadas en función do servizo que se preste ao cliente.

Botas destacou que esta nova organización das oficinas da entidade financeira obedece a un modelo de relación co cliente máis funcional, próximo, innovador, eficiente e sostible.

"Apostamos por un modelo que aúna os principais eixos da nosa estratexia: a dixitalización, a especialización e a proximidade", asegurou o conselleiro delegado de Abanca durante o acto de inauguración.

Explicou que este novo espazo está dotado co equipamento e funcionalidades tecnolóxicas máis innovadoras do mercado, que facilitan a mobilidade dos xestores e reducen tempos de espera e procesos.

A oficina conta cun equipo de 9 profesionais, entre os que figuran xestores de negocios, de banca persoal e de previsión e planificación social.

O presidente de Abanca tamén destacou durante a súa intervención a importancia da tecnoloxía no novo modelo de oficina: "Somos unha entidade que cre firmemente nas bondades do proceso de dixitalización que está a transformar xa tanto a sociedade en xeral como a economía en particular".

O novo deseño da sucursal contempla catro mesas de atención personalizada ao cliente e cinco salas de reunións, que outorgan unha maior privacidade.

A oficina conta tamén con dous postos de atención transaccional para a operativa en efectivo e as tarefas máis administrativas.

Todo o equipo da oficina posúe tabletas Microsoft Surface que permiten unha total mobilidade para dar unha mellor resposta ás demandas dos clientes.

As novas instalacións albergan dous caixeiros de última xeración para realizar operacións e están dotadas cunha rede wifi gratuíta.

Durante esta visita institucional a León, o presidente e o conselleiro delegado asistiron tamén ao adestramento do Abanca Ademar, que milita na liga Asobal de balonmán e ao que a entidade financeira patrocina.

Os máximos directivos da entidade financeira tamén aproveitaron a súa estancia na cidade para percorrer no Museo de León a exposición 'Novas lecturas. Diálogos no tempo e no lugar' cando se cumpre un mes da súa apertura.

A mostra forma parte dos fondos da entidade, a principal colección artística de Galicia.

Durante a visita estiveron acompañados dunha representación do empresariado leonés, cos que mantiveron máis tarde un xantar de traballo.