Carmen Lence: "Cambiamos de filosofía; o gandeiro é o noso socio"

"Paixón e responsabilidade". Son as dúas premisas que levaron a Carmen Lence Ferreiro (Lugo, 1970) a aparcar o seu traballo e a vida que tiña en Boston co seu marido e os seus dous fillos, de 13 e 11 anos, para regresar a Lugo e tomar as rendas da Grupo Leche Río tras o falecemento do seu pai en abril de 2019. Experta en desenvolvemento de liderado e creación de equipos altamente efectivos, formada e cunha profusa traxectoria profesional en coaching executivo desenvolvida en Asia, Europa e Estados Unidos, onde exerceu como profesora na prestixiosa Universidade de Berkley, a CEO encabeza "un cambio de cultura" no negocio familiar. 

Convencida de que a clave do éxito na dirección deste tipo de empresas —que sosteñen en Galicia o 86% do emprego e son responsables do 85% da riqueza xerada cada ano— reside en rodearse dun equipo de profesionais experimentados e saber "facer boas preguntas, escoitar e discernir a boa e mala información" para tomar decisións acertadas, a executiva protagonizou este mércores a terceira edición dos E-ncontros organizados polo Grupo El Progreso.

Ante un sector lácteo ao que augura "un gran futuro" nun escenario no que a produción está en máximos históricos e o número de granxas reduciuse por baixo das 7.000 como consecuencia da profesionalización, Lence destaca que o Grupo Leche Río operou "un cambio de filosofía" na área de compras. "Agora pensamos no gandeiro como o noso socio, e queremos axudalo a mellorar a súa empresa, porque o bo para el é o bo para nós", explicou durante o foro moderado polo director de El Progreso, Alfonso Riveiro. Os esforzos concéntranse en apoiar as explotacións na consecución da certificación de benestar animal e a seguinte fase será guialos para gañar eficiencia e implantar a economía circular. 

"Como empresa familiar, unha das vantaxes é que tomamos decisións moi rápido; non pasamos por 50 xerentes", sinala

A compañía —a única galega entre os primeiros dez grupos lácteos de España— pon en valor a súa decisión de manter os prezos que abona aos gandeiros. A súa estratexia desmárcase doutras empresas "que están a intentar renegociar" á baixa os contratos a un ano nun momento no que a caída das exportacións debido ao Covid-19 está a alentar un abaratamento das materias primas que inciden na fixación dos prezos do leite. 

Ancorado nunha comunidade da que sae o 40% do leite que se produce en España e que é a oitava rexión europea por produción, o grupo referenda a súa aposta por Galicia e por coidar "o gandeiro". No centro, a convicción da CEO de que o medio rural "é fundamental" e urxe dotalo de servizos para que sexa atractivo para fixar poboación e que o emprendemento xermine. 

SEGUNDA RECLUSIÓN. Retransmitido en directo a través das webs de El Progreso e Diario de Pontevedra, o evento tamén serviu para abordar as perspectivas económicas. Ante prognósticos como o da patronal CEOE, que indica que se no outono se impón unha segunda reclusión o PIB español podería contraerse ata un 15,5% en 2020, a tamén presidenta de Grupo Lence Torres móstrase taxativa ao rexeitar que se impoña un novo parón. "Teremos que afacernos a vivir co virus ata que teñamos a vacina e deberemos xerenciar os rebrotes, pero non podemos pechar a economía", recalcou, para engadir que se a actividade se detén tamén se producirá "un impacto na saúde da xente". 

Con todo, Lence móstrase optimista ante o desenvolvemento de tratamentos e confía en que xa pasase o peor. Casada cun executivo dunha multinacional farmacéutica, incide en que en Estados Unidos "hai varias compañías producindo a vacina a risco", isto é, que xa as están fabricando a pesar de que aínda están en fase de proba para poder sacalas ao mercado canto antes unha vez que o seu uso sexa aprobado polas autoridades sanitarias. 

Lence: "Haberá que aprender a xerenciar os rebrotes; pero non podemos volver pechar a economía"

A nivel laboral, volvendo a vista aos meses do estado de alarma, a conselleira delegada destaca que os expedientes de regulación temporal de emprego supuxeron "un balón de osíxeno" para autónomos e empresas, e tamén destaca a implantación exitosa do teletraballo na compañía. "Non podiamos ir ás plantas [o grupo ten catro envasadoras], pero as teleconferencias incluso nos permitiron coñecernos como persoas e non só no noso rol do traballo". 

Ante unha crise que deixou moitas familias na cuneta, a empresaria lucense avala a pertinencia de instaurar o ingreso mínimo vital, aínda que incide en que as axudas deben ser "puntuais". Ao seu xuízo, en mans das administracións está facilitar á poboación a opción de gañarse "a vida cun traballo digno", fomentando a promoción persoal e profesional, en lugar de propiciar que a picaresca leve a subsistir a base "de subvencións do Estado".

MULLER NA EMPRESA. Muller nun sector que pasou de estar monopolizado polos homes a abrirse ao liderado feminino, Carmen Lence avala a necesidade de contar cun sistema de cotas nos consellos de administración en España para conseguir equilibrar a balanza. E máis cando existen estudos que referendan que "tendemos a contratar xente coma nós", de tal modo que, ante candidatos con igual experiencia, un directivo tenderá a elixir "a un home" en lugar de unha profesional. 

"O meu pai deixou unha sombra moi longa; eu era unha descoñecida e funme gañando a confianza de gandeiros, empregados e clientes", di

Cunha forte mentalidade de cambio e moi próxima no trato, a executiva foi aos poucos abríndose paso na industria láctea, na que o seu proxenitor, Jesús Lence, deixou "unha sombra moi longa". "Eu era unha descoñecida e, traballando, funme gañando a confianza de gandeiros, empregados e clientes", constata. 

EMPRESA FAMILIAR. Coñecedora das vantaxes e inconvenientes que comporta a xestión dunha empresa familiar, sitúa entre as fortalezas o feito de que se trata de negocios que "miran a longo prazo" e teñen por bandeira "o compromiso coa terra" na que están asentadas. Como proba dese arraigamento, destaca que tanto Inditex como Hijos de Rivera optaron por non aplicar ningún Erte a pesar de ver caer a súa facturación co coronarvirus. Tamén ve clave a tendencia a capitalizar os beneficios para facer fronte ás crises con recursos propios e así evitar o sobreendebedamento. "A empresa familiar sempre tende a pensar dunha forma máis humana", conclúe. 

A executiva revalida a aposta polo Breogán

Preguntada por un dos asistentes ao foro virtual polo futuro das actividades de mecenado deportivo da empresa, a primeira espada do Grupo Leche Río revalidou a aposta polo Breogán. Recordou que aínda que o seu pai e predecesor á fronte do negocio familiar "non era un gran deportista", apoiaba o club de baloncesto, "porque apoiaba o que é importante para Lugo".   

Ademais do seu papel como patrocinador, o grupo destaca o investimento que realizou na ampliación de capital acometida o ano pasado. "Agora temos un consello de administración que realmente vexo implicado e que está aí polas razóns correctas, porque quere que o Breogán triunfe", indicou Carmen Lence.  

En canto ao futuro das estacións de servizo do holding, que operan case todas como franquías de Repsol, a empresaria avanzou que a intención é instalar unha gasineira, dado que "o futuro está nas renovables". A executiva tamén levou o cambio ao grupo hostaleiro, renovando o modelo de negocio e dando formación ao persoal. 

"O meu pai era extraordinario negociando; a súa cabeza era un computador, pero custáballe delegar"

Filla do que foi un dos referentes do sector lácteo galego —con 25 anos plantou a semente do que agora é un conglomerado empresarial ao levantar unha gasolineira no Corgo—, Carmen Lence afirma sentirse "orgullosa" do legado do seu proxenitor. "Hónrame que confiase en min, porque podía vender", explica a presidenta de Grupo Lence Torres, o holding que agrupa os negocios familiares, que se estenden ao transporte, a hostalería e as estacións de servizo. 

Da experiencia que se forxou ao traballar de xeito conxunto con Jesús Lence recorda aprender "moitísimo", aínda que como todo na vida, tivo as súas contrapartidas polo carácter "autócrata" do seu predecesor. "Era unha persoa extraordinaria negociando, oxalá eu fose a metade de boa ca el. Tiña os números na cabeza, que era como un computador, pero custáballe delegar", admite a CEO de Grupo Leche Río.

Foi por iso polo que en 2005 optou por seguir o seu marido a Xapón ao "sentir que non aprendía tanto" como debería na compañía. No país asiático aproveitou a súa bagaxe e a experiencia adquirida na Asociación Galega da Empresa Familiar para formarse como consultora e así "axudar" aos negocios xestionados por sagas "a ser mellores".  

Respecto ao futuro dos seus fillos no grupo, ten claro que, aínda que lle gustaría que a sucedan, non llelo imporá, senón que lles inculcará que deben ser "uns donos responsables, que saiban pedir contas, información e coidar do seu patrimonio". 

PATROCINADORES. Cun éxito notable de seguimento, esta terceira edición dos E-ncontros contou co patrocinio da compañía lucense Frisaqués, Caixa Rural Galega e o Centro de Estudios Superiores Universitarios de Galicia (Cesuga).