A central sindical demanda que se lle permita aos traballadores de BBVA ter a última palabra sobre a firma do acordo, someténdoo "a un referendo aberto e democrático", informa nun comunicado.
"O ERE NON NOS VALE". O sindicato nacionalista convocou na tarde deste martes concentracións "de urxencia" diante de oficinas do banco na Coruña, Lugo, Santiago, Vigo e Ourense, para mostrar o rexeitamento ao Ere, que en Galicia suporá o despedimento de 101 persoas, sinala.
"O Ere non nos vale e tampouco compartimos a visión dos sindicatos que o avalan: hai despedimentos e se precarizan as condicións do persoal que queda, principalmente na atención en remoto", critica o secretario da sección sindical da CIG.
Engade o sindicalista que "pouco avance supón despedir a compañeiros e compañeiras de menos de 50 anos, pois se o banco considera que hai un excedente de persoal, pode liquidalo con saídas que sexan verdadeiramente voluntarias e primadas para os traballadores de máis de 60 anos. Unha alternativa menos traumática e de menor custo social", opina.
Fernández sinala que BBVA se aproveita das facilidades introducidas pola reforma laboral, que o Goberno mantén plenamente vixente, para desfacerse de miles de traballadores e empeorarlle as condicións ao persoal que queda, aplicándolle modificacións horarias e mobilidade xeográfica, cando o banco obtivo beneficios mil millonarios, a cúpula directiva subiuse os salarios de manea escandalosa, e mentres deixa sen acceso aos servizos financeiros a amplos sectores sociais, principalmente ás zonas rurais e ás persoas maiores e ás que teñen máis dificultades para manexarse na banca dixital".
ACORDO. O BBVA alcanzou este martes un acordo cos sindicatos para que o despedimento colectivo afecte finalmente a menos de 3.000 empregados, exactamente a 2.935, o 10% do persoal, tras reducir a proposta inicial do banco en 863 persoas e mellorar novamente as condicións de saída.
Desa forma, os 3.798 despedimentos expostos inicialmente polo banco quedarán en 2.935, o 10% dos 29.330 empregados en España; se se exclúen os traballadores de distintas sociedades que non se verán afectados, as saídas supoñen o 12,6% do persoal.
Da rede de sucursais sairá o groso dos despedimentos, pero CC OO confía en que o "amplo catálogo de opcións de saída" permita que non haxa ningunha saída forzosa e destaca que agora máis do 72% das saídas serán de maiores de 50 anos.
O acordo entre o banco e os sindicatos chega unha semana logo da folga secundada por parte dos traballadores.
CONDICIÓNS DO PACTO. O BBVA ofrece ao final aos traballadores de 53 a 54 anos, con dez anos de antigüidade, unha renda do 65% do salario actual e convenio especial da Seguridade Social ata os 63 anos con revalorización do 3% anual, e desconto da prestación de desemprego e subsidio.
Aos que están entre 55 e 62 anos, o banco está disposto a pagar agora o 75% do soldo e convenio especial da Seguridade Social ata 63 anos con revalorización do 3%, así como o desconto da prestación de desemprego e subsidio.
Pola súa banda, os de 63 anos ou máis seguirían percibindo unha indemnización de 20 días por ano traballado cun tope de 12 meses.
No caso dos traballadores de entre 50 a 52 anos que se acollan ao plan de baixas, a indemnización fíxase no 65% do seu nivel retributivo anual, multiplicado agora por seis e cun novo máximo que chega a 320.000 euros.
A iso engádese o convenio especial da Seguridade Social ata os 63 anos en renda temporal dun fixo anual de 15.500 euros; unha prima de 2.000 euros por cada trienio de antigüidade; unha prima de 15.000 euros por difícil recolocación e unha prima de voluntariedad de 25.000 euros, que se eleva a 30.000 se o traballador ten unha antigüidade superior a 15 anos.
Para o resto, isto é, menores de 50 anos e persoas con menos de 10 anos de antigüidade, a indemnización que ofrece ao final o BBVA é de 40 días por ano, cun novo tope de 30 mensualidades; unha prima de 2.000 euros por cada tres anos na empresa, e outra, de voluntariedad, de entre 5.000 e 30.000 euros.
O banco mellora así mesmo as condicións nos casos de mobilidade xeográfica e xa aceptara a proposta de CC OO para dar a posibilidade de que haxa ata 210 excedencias incentivadas.
O sindicato considera que se trata dun acordo que se desmarca moi positivamente dos asinados nos últimos tempos no sector e que marca o camiño dos que van seguir a este.
As mobilizacións, paros e a folga que tiveron un seguimento masivo por parte do persoal do BBVA foi "a motor clave" para desencallar a negociación e conseguir que o banco acabase cedendo a unha posición moi dura na negociación, argumenta o sindicato.
