Representantes de confrarías pesqueiras galegas e asturianas denunciaron este martes en Bruxelas que a Unión Europea (UE) "ignora as problemáticas da pesca artesanal" tras unha reunión con representantes da Comisión Europea (CE) e a dirección xeral comunitaria de Asuntos Marítimos e Pesca.
"Hai que salvar este tipo de pesca, que é o máis sustentable", asegurou á prensa o Patrón Maior da Confraría de Cangas, Francisco Javier Costa, quen defendeu que a pesca artesanal "debería estar exenta dos Totais Admisibles de Cotas (TAC) e de descartes en augas interiores".
Costa foi especialmente crítico coa lei que entrará en vigor en 2019 e ampliará as obrigacións de desembarcos pesqueiros nos portos, xa que entende que "algúns barcos non poderán ir ao mar, veranse obrigados a despedir traballadores ou deixarán de ser sustentables".
"A pesca artesanal xera só en Galicia ata 9.000 empregos directos e non ten nada que ver coa industrial, non se lle poden aplicar os mesmos criterios", reivindicou o Patrón Maior da Confraría de Cangas, que afirmou que a frota artesanal é "a que menos prexudica á contorna".
Neste sentido, a eurodeputada de Esquerda Unida Europea Lidia Senra asegurou que medidas como as cotas "tómanse pensando nas grandes frotas, que son as que provocan os problemas, pero afectan máis á pesca artesanal, a máis sustentable".
Francisco Javier Costa "A pesca artesanal xera só en Galicia ata 9.000 empregos directos e non ten nada que ver coa industrial, non se lle poden aplicar os mesmos criterios"
"A frota artesanal está profundamente discriminada, pero se houbese vontade política podería estar exenta dos TAC e dos descartes en augas interiores como as das rías galegas, o que solucionaría boa parte dos seus problemas", afirmou Senra.
Pola súa banda, a Secretaria da Federación de Confrarías de Asturias, María José Rico, subliñou a importancia de trasladar á CE e á dirección xeral de Asuntos Marítimos e Pesca da CE "as problemáticas ás que se enfronta o sector máis aló do papel".
"Teñen que saber como afectará as comunidades costeiras a redución de cotas, que penaliza particularmente á pesca artesanal, a que menos frota ten", asegurou Rico.
Por último, o mariñeiro galego José Andrés Pousada denunciou "a falta de información por parte dalgunha confraría sobre como nos afectan as leis europeas".
"Houbo unha ocasión na que pesquei caballas sen saber que estaba pechada a súa captura e ao chegar a terra tiven que pagar unha multa", lamentou Pousada.
A pesar de que lamentaron que na reunión nin os representantes da CE nin os da dirección xeral comunitaria de Asuntos Marítimos e Pesca lles trasladaron solucións, a delegación mostrouse satisfeita por poder trasladar as súas reivindicacións ás institucións europeas.
