A ministra de Traballo, Yolanda Díaz, referiuse este sábado á figura do expediente de regulación temporal de emprego (Erte) e á súa posible duración, defendendo que "o Executivo non creou un sistema de protección para deixalo caer agora". "Non sería correcto nin, economicamente, adecuado", engadiu. A súa última prórroga chega inicialmente ata o 30 de setembro.
Tras reunirse en Balears co Govern e axentes sociais, Díaz subliñou que "o sistema implantado polo Goberno salvou máis de 550.000 empresas e 3,4 millóns de traballadores en España". E puxo en valor, ademais, a bonificación aos fixos descontinuos, para recordar que "é a única medida que se estendeu ata o 31 de decembro".
Nese sentido, asegurou, "traballarase para evitar que queden sen protección social por non ter período efectivo de ocupación ao non ter campaña turística".
