Os ministros de Finanzas e de Economía da eurozona aprobaron este venres o terceiro rescate a Grecia, o que supón un novo programa de asistencia financeira a ese país de ata 86.000 millóns de euros e tres anos de duración, dixeron a Efe fontes europeas.
O acordo, que se produciu tras seis horas de deliberacións nunha reunión extraordinaria do Eurogrupo, prevé un primeiro desembolso de 26.000 millóns de euros que se dividirá en dous tramos.
Este monto repartirase en dous subtramos: un de 10.000 millóns de euros, que estará inmediatamente dispoñible nunha conta especial do fondo de rescate da eurozona para a recapitalización da banca grega.
O segundo, de 16.000 millóns de euros, será desembolsado a Grecia en varios pagos, comezando por un de 13.000 millóns antes do 20 de agosto, xusto a tempo para que Atenas poida facer fronte ao desembolso de 3.400 millóns de euros ao Banco Central Europeo (BCE), segundo a declaración do Eurogrupo.
Outro desembolso farase no outono e estará suxeito á implementación de medidas claves acordadas no memorando de entendemento que fixa as condicións do novo programa e que serán especificadas polas institucións europeas e acordadas polos número dous dos ministros de Finanzas e Economía.
Un segundo desembolso para a recapitalización da banca de ata 15.000 millóns de euros poderá pagarse logo da primeira revisión do rescate e en todo caso antes do 15 de novembro, suxeito á planeada revisión da calidade dos activos bancarios e as probas de resistencia.
En total haberá así 25.000 millóns de euros para sanear ou liquidar a banca grega con problemas.
O presidente do Eurogrupo, Jeroen Dijsselbloem, explicou en rolda de prensa que o consello de gobernadores do Mecanismo Europeo de Estabilidade (Mede) espera poder dar o seu visto e prace o día 19 pola tarde como parte do procedemento, o que "desbloquearía o tramo inicial" do rescate.
"Todo o intenso traballo durante as últimas semanas mereceu a pena", sinalou Dijsselbloem, quen dixo que a reunión extraordinaria do Eurogrupo deste venres foi "moi construtiva".
O Eurogrupo aproba un terceiro rescate a Grecia de 86.000 euros
Tras seis horas de deliberacións, os ministros de Finanzas aceptan o plan de axuda financeira durante tres anos
