Os ministros de Economía e Finanzas da eurozona (Eurogrupo) alcanzaron este xoves un acordo para desbloquear un pago de 8.500 millóns de euros a Grecia no marco do rescate da súa economía. As institucións europeas —Comisión Europea, Banco Central Europeo (BCE) e Mecanismo Europeo de Estabilidade (Mede)— e o Fondo Monetario Internacional (FMI) lograron finalmente un acordo para pechar a segunda revisión do rescate tras oito meses de atraso.
"Compráceme anunciar que alcanzamos un acordo sobre todos os elementos, condicionalidade e estratexia sobre a débeda e a participación do FMI", anunciou nunha rolda de prensa o presidente do Eurogrupo, Jeroen Dijsselbloem.
O director xerente do Mede, Klaus Regling, explicou que a previsión é que un primeiro tramo de 7.700 millóns, dos cales 6.900 millóns dedicaranse a vencementos de débeda e os 800.000 euros para atrasos de pagos. Os 800.000 euros restantes, tamén para atrasos, desembolsaranse despois do verán.
Pola súa banda, a directora xerente do Fondo Monetario Internacional (FMI), Christine Lagarde, explicou que proporá ao Directivo Executivo do organismo internacional participar no rescate cunha cifra que será aproximadamente de 2.000 millóns de dólares, aínda que explicou que este acordo "en principio" está condicionado a que os socios do euro definan os detalles da reestruturación de débeda que se efectuará ao finalizar o programa. Lagarde afirmou que houbo progresos "claros" sobre o alivio da débeda helena pero o FMI considera que aínda é necesario concretar as medidas que se aplicarán e o Eurogrupo necesita "máis tempo" para "identificar" as medidas e o "alcance" da reestruturación para que sexa sostible no longo prazo.
"O desembolso só terá lugar unha vez que o alivio de débeda sexa completamente identificado", subliñou.
O Eurogrupo desbloquea 8.500 millóns para Grecia
O acordo permite pechar a segunda revisión do programa de axuda ao país heleno tras oito meses de atraso
