O Ministerio de Emprego retirou durante o primeiro semestre de 2013 a prestación por desemprego a 60.004 persoas que a cobraban de forma indebida, o que supón un 14,8 % máis que no mesmo período dun ano antes.
Este dato deuno hoxe a ministra de Emprego, Fátima Báñez, nunha carta aberta aos medios titulada A loita contra a fraude laboral é responsabilidade de todos.
Segundo explica a ministra, a retirada da prestación debeuse a falta de dispoñibilidade para o emprego do perceptor ou a un incumprimento dos requisitos de acceso e mantemento da mesma.
Esta eliminación da prestación supuxo un aforro de 915,2 millóns de euros, cando no primeiro semestre de 2012 foi de 796,1 millóns, indícase na misiva.
Outro dato que resalta Báñez é que se incrementaron un 30,57 % as infraccións de empresarios por dar ocupación a perceptores de prestacións por desemprego ou por facilitar indebidamente o acceso ás mesmas.
Así mesmo, detectouse a 5.833 traballadores que compatibilizaban indebidamente as prestacións co traballo, ou que as obtiveron fraudulentamente, o que fronte aos 4.526 do ano anterior supón un incremento do 28,88 %.
En materia de loita contra as empresas ficticias a Inspección fixo 14.842 actuacións (fronte ás 10.105 do mesmo período do ano anterior), o 46,88 % máis.
Nelas atopáronse 1.964 infraccións, o 146,26 % máis que no primeiro semestre de 2012, no que houbo 809.
Respecto diso, a ministra de Emprego asegura que é a "vontade e a obrigación" do Goberno pór todos os recursos ao seu alcance para acabar con este tipo de prácticas fraudulentas.
Queda aínda moito traballo por facer, recoñece Fátima Báñez, quen considera que todos deben involucrarse nesta loita.
