O presidente de Ence Enerxía e Celulosa, Ignacio Colmenares, pediu ao Goberno acelerar o calendario do Plan Nacional Integrado de Enerxía e Clima (PNIEC) e anticipar as poxas de renovables para este outono co "fin de impulsar a recuperación 'verde'" tras a crise pola covid-19. Na súa intervención no Cume Empresarial da CEOE, afirmou que, canto antes se empece a construír centrais eléctricas renovables, "mellor", e subliñou que sería un gran impulso acelerar o calendario da 'folla de ruta' marcada polo Goberno para o horizonte de 2030 e "chegar antes ás metas".
O directivo tamén considerou esencial o impulso da industria española de equipos e compoñentes, ante a posibilidade que ofrece "unha potente industria española" para o desenvolvemento das renovables. A este respecto, destacou que a compañía conseguiu xa que as caldeiras, "o corazón" dunha planta de biomasa, que antes se importaban, se fabriquen en Barcelona ou Andalucía.
NON APOIAR SÓ A AUTOMOCIÓN. Así mesmo, esixiu unha igualdade de trato e que se que se apoie por igual ao investimento produtivo por parte de toda empresa, "aínda que non sexa de automoción".
Por outra banda, o máximo executivo de Ence pediu "fuxir de dogmatismos que leven a reinterpretar os prazos do regulamento da lei de Costas" e que ameazan o futuro da biofábrica de Pontevedra, que é un "modelo de bioeconomía e economía circular" e xera 5.000 empregos en Galicia entre directos e indirectos.