Estrella Galicia avanza na minimización dos residuos e, polo tanto, da súa pegada de carbono cun novo lanzamento. Trátase dun formato sen ningunha embalaxe na súa pack de latas. O Non Pack prescinde do cartón que ata agora recubría as cervexas.
¿En que consiste? A innovadora solución supón unir as latas entre si cuns puntos de cola. Segundo os cálculos da Corporación Hijos de Rivera, por esta vía reducirase "nun 40% a pegada de carbono de cada un dos packs de seis".
"A nosa ambición é facer as cousas sempre mellor, buscando novas formas de xerar un maior impacto positivo", recalca o presidente da compañía ancorada no polígono da Grela, Ignacio Rivera, quen incide en que o grupo "traballa constantemente" para lograr que os produtos resulten "cada vez máis respectuosos coa contorna" e cun alto grao de innovación. "Cremos que a mellor embalaxe para o planeta é a que non existe", declara o executivo.
O Non Pack chegará progresivamente aos lineais dos establecementos comerciais. Afectará aos paquetes de latas de 6x25 cl e 6x33 cl de Estrella Galicia Especial. Despois, farase extensivo a Estrella Galicia 0,0; a 1906 Reserva Especial e a Red Vintage. Do deseño deste novo formato encargouse KHS.
Para reducir os refugallos nos formatos máis grandes, o filme que recubre as caixas de 12 e 24 latas cambiarase por papel 100% reciclable. Con iso, a compañía —que pon en valor que nunca utilizou anillas de plástico para vender os seus produtos— prevé eliminar todo o plástico secundario de todos os seus formatos en lata.