A Corporación Hijos de Rivera renova a imaxe das cervexas Estrella Galicia, un cambio que comprende un envoltorio máis sostible. Segundo informou este venres a compañía con sede no polígono coruñés da Grela, o novo deseño estará presente desde este mes en todos os formatos. A modificación consiste nunha revisión da actual imaxe de marca, que data de 2006, para recuperar o deseño orixinal da estrella presente na súa primeira etiqueta.
A idea é "diferenciarse e sorprender ao consumidor" á vez que a cervexeira afianza o seu "carácter artesán".
En canto ao packaging, para reducir a súa pegada de carbono, o grupo reduce nun 12% o vidro das súas botellas, co que estima que evita xerar unhas 10.000 toneladas de residuos na produción. Ademais, empregará papel branco certificado co selo FSC nas súas etiquetas.
Ao ser de aluminio, as latas, do seu lado, son "infinitamente reciclables", un feito ao que se suma o selo Meta Recycles Forever. En canto ao seu envoltorio, ademais de empregar un 50% de plástico reciclado no retractilado dos seus packs, Hijos de Rivera tamén reaprovecha os seus residuos de cartón para producir as súas caixas e bandexas. Con todo iso, espera evitar a emisión de 9.000 toneladas de CO2.
Mónica Vizcaíno, directora de marca global de Hijos de Rivera, destaca que a idea é "elaborar a mellor cervexa posible non só por dentro, senón tamén por fóra". "Máis limpa e máis guapa, esperamos que vos guste", afirmou nun comunicado. O grupo sumouse en abril ao Pacto Mundial de Nacións Unidas, a maior iniciativa de sustentabilidade corporativa do mundo.
