Hijos de Rivera incorpora por primeira vez unha marca de ron á súa oferta de distribución na Península ibérica tras sumar forzas coa emblemática casa Caney. Desde esta mesma semana, o grupo coruñés propietario de Estrella Galicia converterase en distribuidor en exclusiva para España e Portugal da gama de ron da marca de maior tradición e prestixio en Cuba.
Así achegará aos clientes da canle de hostalería e alimentación diferentes variedades de Ron Caney: Carta Blanca, Oro Ligero, Centuria e o de 12 anos, as referencias máis representativas desta destilería con máis de 150 anos de historia, a máis antiga da illa caribeña.
Caney mantén a receita orixinal dos mestres roneros para a produción desta bebida. O seu ron madura durante varios anos en toneles de carballo e elabórase sen engadir colorantes nin saborizantes.
Con esta nova incorporación, Hijos de Rivera continúa sumando marcas de prestixio ao seu catálogo de distribución. Abarca desde cervexas de importación como Budvar, Der Halve Maan, BrewDog, Erdinger, Grolsch, O Hara´s ou Peroni, a viños como Abadía Retuerta, Cillar de Silos, Ganbazán, Marqués de Murrieta ou Dominio de Pingus. Tamén figuran os champagnes Dom Perignon ou Moët, entre outras referencias.
A compañía destaca a súa consolidación como "distribuidor de referencia" na Península.
