O acordo que o Ministerio de Agricultura busca selar coas comunidades para a aplicación da futura política agrícola común (PAC) (2023-2027) postérgase ao outono. Coa tarefa de trazar o plan estratéxico nacional que España deberá presentar á Comisión Europea (CE) antes de fin de ano, o ministro, Luís Planas, reuniuse este mércores cos responsables autonómicos do ramo e, segundo explicou o conselleiro de Medio Rural, José González, "houbo moi boa sintonía", polo que se mostrou confiado en que o pacto calle "entre finais de setembro e inicios de outubro". E é que o documento técnico que presentou o Goberno central non contenta a todas as comunidades, entre elas as da Cornixa Cantábrica. En xogo está a repartición de 47.724 millóns de euros neses cinco anos.
Ao termo da cita celebrada en Madrid, o representante da Xunta celebrou atar a regularización dunhas 75.000 hectáreas de pastos e forraxes que os agricultores e gandeiros galegos declaran ao solicitar as axudas da PAC, aínda que non cobran dereitos por estes terreos "por circunstancias históricas". González deixou claro que antes de abrir os dereitos da política agrícola comunitaria a novos cultivos, como froitas, hortalizas ou viñedos, o que beneficiará ao sur, é necesario liquidar a situación de Galicia. "Saímos co compromiso de que se vai regularizar esta situación pola vía da reserva nacional a partires de 2023 para que esas superficies pasen a cobrar", explicou, para logo recordar que Galicia é a comunidade con maior déficit de superficie admisible, cun diferencial dun 30% sobre a media española.
Pola súa repercusión nas granxas galegas, González tamén celebrou a decisión de elevar as axudas asociadas para o vacún de leite en 23 millóns a nivel nacional.
Ao entrar na reunión, advertiu que a Xunta establece a negociación coa "liña vermella" de manter polo menos o mesmo volume de fondos para os agricultores e gandeiros galegos —só en axudas directas este ano 24.000 explotacións repartiranse algo máis de 170 millóns de euros—.
Tamén se marcou o reto de convencer ao ministerio de que o novo modelo de PAC debe asimilarse máis á agricultura e gandería que defende a Cornixa Cantábrica, unha paradigma baseado "nas pequenas e medianas explotacións con base territorial e moi profesionalizadas", en consonancia coas liñas que marca Bruxelas. Á vista do documento do ministerio, o conselleiro constatou que "ou modelo proposto é máis propio do sur e do Levante". "Non quero entrar nunha batalla de territorios, pois todos somos españois, pero debemos ter unha postura conxunta", dixo.
Nesta liña, o Executivo galego reivindica reorientar cara aos pequenos e medianos produtores o pago redistributivo, mediante o cal os Estados poden optar por destinar ata o 30% do seu orzamento nacional de apoio á renda a axudar aos pequenos agricultores. Tamén reivindicou aplicar "con máis intensidade" o capping, isto é o tope máximo de subvencións por explotación, espremendo os límites que fixa a UE.
