Os agricultores e gandeiros galegos, tal e como anunciara a semana pasada o presidente da Xunta de Galicia, Alberto Núñez Feijóo, poderán solicitar a partir deste venres -1 de febreiro- o pago das axudas da Política Agraria Común (PAC), que suman nesta ocasión un montante de 210 millóns de euros. O Diario Oficial de Galicia (DOG) publica a Orde da Consellería de Medio Rural que regula a aplicación dos pagos directos a agricultores e gandeiros, así como as axudas ao desenvolvemento rural, suxeitas ao Sistema Integrado de Xestión e Control, as coñecidas comunmente como axudas da PAC.
Do montante total desta convocatoria, uns 170 millóns de euros correspóndense con pagos directos da PAC, mentres que os 40 millóns restantes están vinculados a medidas agroambientais de desenvolvemento rural -axudas a zonas con limitacións naturais, agricultura ecolóxica e para o mantemento de plantacións forestais en terreos non agrícolas-.
Os gandeiros e agricultores galegos poderán presentar a "solicitude única" de forma telemática a partir deste venres, que é a primeira data que permite a propia normativa, e ata o próximo 30 de abril. A Xunta aclara, nun comunicado, que "sacou a publicación desta liña de axudas canto antes" para que "as persoas interesadas" teñan coñecemento do seu contido e dispoñan de tempo para "presentar adecuadamente a súa solicitude".
Para iso, a Consellería de Medio Rural traballa con máis de cincuenta entidades colaboradoras, que prestan o seu apoio ás persoas interesadas en solicitar esas axudas, entre as que destacan as propias entidades bancarias, asociacións agrarias e organizacións profesionais. Segundo a previsión do goberno galego, uns 30.000 produtores solicitasen estas axudas, que xestiona o Fondo Galego de Garantía Agraria.
