Os ministros de Economía e Finanzas da eurozona constataron este mércores que aínda non hai base para chegar a un acordo con Grecia, polo que a última hora decidiron renovar o Eurogrupo este xoves, mentres Atenas e as institucións mantiñan unhas intensas negociacións. Con todo, esta negociación cos acredores, que se prevía que continuase de madrugada, interrompeuse pasada a medianoite, coa promesa de reiniciala pola mañá, antes do Eurogrupo.
A directora xerente do Fondo Monetario Internacional (FMI), Christine Largarde, e o presidente do Banco Central Europeo (BCE), Mario Draghi, foron dos primeiros líderes en abandonar o encontro, o segundo deste tipo que manteñen nas últimas 24 horas, tras apenas hora e media de conversacións.
As institucións, formadas pola Comisión Europea (CE), o Banco Central Europeo (BCE) e o Fondo Monetario Internacional (FMI só informaron os ministros "sobre o proceso e os progresos feitos ata o momento", sinalou o presidente do Eurogrupo, Jeroen Dijsselbloem á saída da reunión que apenas durou unha hora. Os acredores esixiron a Atenas máis recortes para pechar un acordo. "Desafortunadamente non logramos un acordo aínda, pero estamos determinados a continuar o traballo. Esta tarefa vai continuar durante a noite se é necesario", dixo.
O Eurogrupo continuará este xoves ás 11.00 gmt (13.00 en España), aínda que a hora fixada estaba condicionada ao posible acordo nocturno que finalmente non se alcanzou.
A reunión nocturna entre Alexis Tipras e os máximos dirixentes das institucións foi a segunda do día, para tratar de forxar un compromiso que poida ser analizado este xoves polo Eurogrupo e posteriormente referendado polos líderes. Fontes europeas indicaron que na primeira reunión houbo "moi pouco progreso", polo que non había posibilidades de presentar aos ministros documentos que servisen de base para un eventual acordo.
A reunión dos dezanove titulares de Economía e Finanzas iniciouse xa con algo de atraso e estivo marcada desde o principio polas diverxencias entre Grecia e o FMI e o rexeitamento de Atenas a unha proposta modificada por parte desta entidade e das outras institucións acredoras.
En opinión de Tsipras esta volvía bloquear as negociacións despois de que o luns o seu propio plan fose cualificado de "boa base" para un acordo en poucos días, porque para Atenas "xera varios problemas" en materias como o Ive, as pensións ou a lexislación laboral, segundo fontes gobernamentais.
Pola tarde, o Goberno grego afirmou que non podía aceptar a nova proposta das institucións porque supón trasladar o peso das reformas sobre a parte da poboación asalariada e os pensionistas, mentres exime aos que máis teñen. "As institucións presentaron unha nova proposta que traslada a carga sobre traballadores e xubilados con medidas sociais inxustas, mentres que ao mesmo tempo propón evitar o aumento do peso sobre os que máis teñen", sinalaron fontes do Executivo.
