O sector dos vehículos aéreos non tripulados (UAV) convértese, aos poucos, nun motor da economía galega. Cun crecemento da demanda de drons do 60% durante a crise sanitaria —para tarefas como a desinfección de grandes áreas ou o control da temperatura de persoas—, Galicia pasou de sumar 200 operadores autorizados en 2019 a 338 na actualidade.
"É o sector galego no que máis empresas se crearon durante a pandemia", constatou este mércores o presidente da Xunta. Foi no marco da sexta edición de Unvex, o maior evento de drons de España, que tras celebrarse en 2019 en León nesta ocasión elixiu como escenario a Cidade da Cultura, aínda que de aquí a venres tanto a Escola Naval de Marín como o Centro de Investigación Aeroportada de Rozas (Ciar) —que iniciou a súa andaina en 2015— acollerán demostracións en vivo.
Segundo constatou Alberto Núñez Feijóo, o sector dos vehículos aéreos non tripulados (UAV) "é o sector galego no que máis empresas se crearon durante a pandemia"
Cun ecosistema integrado por grandes fabricantes, pemes, emprendedores, centros tecnolóxicos e administracións, "Galicia xa é un referente en España neste ámbito", proclamou Alberto Núñez Feijóo nun evento que congregou a 120 relatores e 70 empresas e que pretende ser un escaparate dos avances da industria.
Cunha inxección pública de 58 millóns, desde a súa posta en marcha, o Ciar mobilizou "case dez veces máis recursos respecto do investimento inicialmente previsto", 165 millóns, involucrando a 50 pemes, centros de coñecemento e a pesos pesados como Indra, Babcock e Boeing. Co obxectivo de converterse "en referente europeo" na certificación de avións non tripulados, desta alianza brotaron 655 solucións tecnolóxicas e produtos, dos cales 60 están no mercado.
Entre eses froitos están o maior dron de uso civil de España, ideado por Indra; dúas embarcacións non tripuladas para mostraxe de augas mariñas desenvolvidas por Seadrone; os helicópteros Lúa e Lumes, que Babcock deseñou para loitar contra o lume; un sistema de atención a peregrinos que entren en parada cardíaca; un dispositivo de xeolocalización de Centum e un sistema de detección e seguimento de pragas.
O foro Unvex, o maior evento de drones de España, congregou en Santiago a 120 relatores e 70 empresas
Agora, o Polo aeroespacial de Galicia entra nunha segunda fase, que implicará a selección novos socios estratéxicos e tecnolóxicos nos próximos cinco anos, cunha licitación que se publicará este mes cunha partida de 40 millóns e que prevé canalizar fondos Next Generation a través da colaboración público-privada. A intención, dixo Feijóo é "asinar entre catro e oito acordos de asociación", achandar a creación de 24 novas empresas, "impulsar a proxección internacional e a comercialización de novos produtos "con denominación de orixe galega" e, con todo isto, crear emprego cualificado.
EXPANSIÓN. Con proxectos en execución por importe de 250 millóns na última década, Feijóo incidiu en que Galicia lidera "a compra pública innovadora" e outorgou o carácter de "prioridade" á ampliación de mercados para as empresas do polo de Rozas. En canto a desenvolvementos, o mandatario dixo que nesta segunda fase buscarase expor solucións para problemas globais como o cambio climático, a silvicultura, ou as políticas marítimas e o desenvolvemento rural e recordou que o polo concorre aos fondos europeos cunha candidatura que podería mobilizar 500 millóns.
Ante un mercado que o director da feira Unvex, Ángel Macho
1.858
Son os operadores de drons rexistrados en Galicia pola Axencia Estatal de Seguridade Aérea (Aesa). En toda España son 31.659. As proxeccións apuntan que en 2025 haberá 48.000 e 72.000 pilotos. "Estamos ás portas dunha revolución que cambiará a forma de transportar persoas e mercancías", constatou Isabel Maestre, a directora da Aesa. Recalcou que as UAV teñen "infinidade de aplicacións", como os rescates en zonas perigosas, a loita contra o lume de noite, a inspección de ocos "recónditos", a repartición de medicamentos e de axuda en zonas en remotas ou en conflito.