Un grupo de empresas biotecnolóxicas socias do Clúster Tecnolóxico Empresarial dás Ciencias da Vida de Galicia (Bioga) coñeceron este xoves que posibilidades ofrece a bioinformática no desenvolvemento de novos fármacos e as posibilidades para acurtar tempos e, en consecuencia, optimizar investimentos. O fundador e CEO da empresa Mind the Byte, Alfons Nonell, foi o encargado de impartir a conferencia en Santiago.
"Quero contar a experiencia de BioIT, un sector específico que ofrece novas tecnoloxías para empresas bio", explicou Nonell, cuxa compañía "desenvolve algoritmos de software para axudar ás firmas biotech a desenvolver mellores moléculas e facelas máis rápido". O prazo de tempo necesario para desenvolver un fármaco pode alcanzar os 20 anos e o investimento podería cifrarse en centos e centos de millóns de euros, difíciles de recuperar a medio prazo. "Nós, con axuda da bioinformática, acurtamos os tempos, optimizamos a fase de descubrimento de moléculas e facemos, por exemplo, predición de efectos adversos".
"A química computacional acurta os tempos de desenvolvemento de novos fármacos de 15 a 12 anos"
En concreto, Nonell citou diferentes estudos e estimou que un período de 15 anos pode acurtarse a 12 . E que o aforro económico, dependendo da aproximación que se aplique, pode chegar ata o 40%. Con fármacos que están xa no mercado e que pretenden aplicarse a novas indicacións, o tempo, e grazas á química computacional vía informática, pode acurtarse de 15 a só cinco anos.
Alfons Nonell admite que a súa compañía está a explorar o mercado de Galicia. "Coñecemos a compañías como GalChimia e sabemos que Galicia está a innovar". Ao seu xuízo, é unha comunidade autónoma "interesante" desde o punto de vista biotech. Mind the Byte confía en alcanzar acordos a curto e medio prazo con compañías galegas. E recorda que a bioinformática pódese utilizar no sector de agroalimentación, moi presente na economía de Galicia. "A nosa técnica tamén pode optimizar, por exemplo, alimentos lácteos e así xerar maior valor engadido". Alfons Nonell cre que poden axudar a "deseñar novas moléculas" á agroalimentación galega.
