A maioría de comunidades autónomas reunidas na tarde do venres no Consello de Política Fiscal e Financeira (CPFF) insisten en reclamar que o Goberno lles realice os pagos do Ive de 2017 e en desligalo da nova proposta de déficit presentada polo Ministerio de Hacienda, que relaxaría as esixencias iniciais. Así, fronte ao obxectivo de equilibrio orzamentario previsto —é dicir, de iguais ingresos e gastos—, presentou unha nova senda pola que establece un obxectivo máis flexible de déficit autonómico do 0,2% do PIB este ano, do 0,1% en 2021 e de equilibrio en 2022, segundo confirmaron fontes do departamento estatal.
O anuncio colleu por sorpresa os conselleiros, a pesar do cal a maioría das comunidades mantéñense na reclamación do Ive —2.500 millóns de euros, 200 no caso de Galicia— porque ese e o do déficit son conceptos diferentes e non se poden compensar.
Así se expresou por exemplo a conselleira socialista de Balears, Rosario Sánchez Grau, quen deixou claro que "o déficit non é compensación da cuestión do Ive, que se tiña que repercutir en 2019". Este goberno, como outros —incluído o galego—, non descarta a vía xudicial para reclamar o cobro.
Manifestáronse en termos parecidos representantes populares como o conselleiro de Facenda da Xunta, Valeriano Martínez, e o de Madrid, Javier Fernández-Lasquetty. O galego recalcou que son "conceptos distintos" e que, ademais, permitir máis déficit é permitir máis débeda, mentres que os fondos do Ive eran recadación. "Non fai falta saber moito de economía. Estásenos dando débeda, pero os recursos en orixe non eran débeda. Isto hai que devolvelo, devolver o que era noso en orixe non é o mesmo", concluíu.
