Norvento dá un novo paso adiante no negocio do almacenamento enerxético co lanzamento ao mercado dun sistema baseado en baterías de ion de litio que está pensado para o seu uso en explotacións industriais e comerciais con autoconsumo. Esta nova ferramenta está deseñada para facilitar o seu despregamento ao usuario, que poderá incorporala directamente nas súas instalacións sen configuracións adicionais que dificulten o seu uso inmediato.
Estes sistemas contan cunha capacidade de almacenamento de entre 50 e 800 quilowatts hora (kWh) e con potencias entre 50 e 400 kilovoltiamperios (kVA), o que permite a súa adaptación a un amplo abanico de casos de uso: desde unha pequena explotación agraria a unha factoría de consumo medio. Nun escenario de auxe do autoconsumo, o grupo lucense explicou onte nun comunicado que complementa así a súa "proposta de valor" nesta área de negocio.
A empresa pon de relevo que a tecnoloxía de almacenamento empregada é "segura, eficiente e operable a un alto número de ciclos con capacidade de chegar a profundidades de descarga moi elevadas", similar á empregada en vehículos eléctricos e teléfonos móbiles.
Estes sistemas de almacenamento enerxético poden resultar especialmente útiles en instalacións industriais e comerciais con consumos de electricidade predominantes en horas punta, nas que a enerxía é máis cara, ou con excedentes de xeración renovable nas súas plantas de autoconsumo. Tamén son vantaxosas para instalacións con restricións para a ampliación de potencia nas que esta circunstancia supoña unha limitación ao seu crecemento. Ademais, resultan unha boa opción para microrredes ou sistemas illados da rede eléctrica que queiran reducir consumo de diésel, e para instalacións que requiran unha subministración eléctrica "fiable, continuo e de calidade", explica a compañía fundada por Pablo Fernández Castro.
A tecnoloxía empregada para o almacenamento é "segura", similar á usada nos vehículos eléctricos e os teléfonos móbiles
CONTROL. Os sistemas están conectados en todo momento co centro de control de Norvento, desde onde se monitoriza toda a súa actividade. Grazas ao despregamento de tecnoloxía de internet das cousas, os usuarios dispoñen de todos os datos a través da nube mediante unha aplicación móbil, podendo vixiar en tempo real os parámetros máis relevantes das súas baterías. Ademais, esta ferramenta inclúe un sistema de xestión de enerxía para o despacho programado de enerxía almacenada.
Fundada en 1981 como unha pequena empresa de enxeñería, hoxe Norvento conta con presenza internacional e a súa actividade abarca desde a fabricación de aeroxeradores de media potencia ou convertidores para almacenar enerxía, ata o deseño, promoción, construción e explotación de parques eólicos, proxectos de xeración distribuída para a industria e solucións de enxeñería enerxética. O grupo conta con máis de 250 MW de plantas de xeración renovable en explotación, máis de 750 MW desenvolvidos e outros 1.000 en desenvolvemento en España e outros mercados.
