A CEOE decidiu, nunha reunión do seu comité executivo, non aceptar a última proposta do Goberno sobre a prórroga dos Erte máis aló do 31 de maio, ao seguir "centrando as axudas" na activación en lugar de nos traballadores que aínda non se poden incorporar á actividade.
Segundo informan fontes da patronal, a decisión tomouse "por unanimidade" dos sectores e o comité Executivo e a intención é "seguir traballando".
A reunión da CEOE arrincou pasadas as 10.30 horas da mañá deste martes tras recibir o luns de noite unha nova proposta do Goberno que reducía as diferenzas entre as exoneracións dos traballadores en Erte e os que se reincorporen, principal escollo das negociacións.
En resposta, o Goberno anuncióu que "seguirá traballando" para tentar acordar as condicións nas que se estenderán os Erte máis aló do 31 de maio. Segundo sinalan a Efe fontes gobernamentais a intención é seguir traballando para tentar pechar esta nova prórroga ata o 30 de setembro con consenso dos axentes sociais, o que descarta que vaia ao Consello de Ministros deste martes.
REUNIÓN DO LUNS. A reunión entre o Goberno e os axentes sociais para negociar a prórroga dos expedientes de regulación temporal de emprego (Erte) ata despois do verán finalizou sen acordo, segundo informaron a Europa Press en fontes da negociación.
O principal escollo para o acordo seguen sendo as exoneracións á Seguridade Social ligadas aos Erte. A proposta que puxo sobre a mesa o Ministerio de José Luís Escrivá para reducir a contía das exoneracións no caso dos traballadores que se manteñen no Erte e aumentalas para os que volven á actividade non gustou aos axentes sociais.
Neste sentido, fontes empresariais consultadas por Europa Press subliñaron que para conseguir o acordo as exencións deben manterse como están agora mesmo na lexislación.
