O presidente de PharmaMar, José María Fernández Sousa-Faro, avanzou que a compañía prepara a súa inminente saída a bolsa en Estados Unidos, que podería producirse a partir do próximo mes. O máximo responsable do grupo, con raíces na galega Zeltia, confirmou tamén que continúa na súa liña de abandono da industria química para centrarse en tratamentos oncolóxicos.
Nunha rolda de prensa celebrada en Vigo antes da celebración da xunta xeral de accionistas, Fernández avanzou que no encontro se votaría a venda de Zelnova, a súa filial produtora e comercializadora de produtos de limpeza, por 33,4 millóns de euros. Espérase que a operación, cuxos compradores son Allentia e Safoles —sociedades participadas, directa e indirectamente, entre outros, polo conselleiro de PharmaMar Pedro Fernández Puentes e persoas vinculadas a el—, xere unha plusvalía neta duns 28 millóns de euros nas contas individuais da compañía e un resultado negativo de aproximadamente 2,5 millóns na conta de resultados do grupo consolidado.
A esta nova operación únese a venda de Xylazel anunciada en setembro de 2018, pola que se ingresaron 21,8 millóns de euros. Desta forma, PharmaMar continúa na súa estratexia de focalizarse na oncoloxía, o seu negocio principal. A directora financeira do grupo, María Luisa de Francia, asegurou que os ingresos procedentes da industria química eran "firmes", aínda que insistiu en que a súa perda non será "drástica" para as contas do grupo.
A este respecto, o presidente de PharmaMar detallou que o desinvestimento do seu segmento de química de gran consumo para centrarse no sector farmacéutico débese ao interese en mostrar unha empresa atractiva e centrada nunha única liña a investidores de EE.UU. Así, explicou que a saída a bolsa no país norteamericano —no Nasdaq— producirase "a partir de mediados de xullo" e que terá lugar no momento no que se espere solicitar un maior valor por acción.
INVESTIMENTO. Durante 2018, o grupo destinou 74 millóns de euros a I+D, dos que o 86 por cento corresponderon á unidade de negocio de oncoloxía co obxectivo de avanzar no desenvolvemento de moléculas. Na parte oncolóxica, destináronse 63,7 millóns de euros a I+D, fronte aos 71 de 2017. Esta caída débese á finalización dun ensaio con lurbinectedina.
Os ingresos derivados da venda do fármaco Yondelis xeraron 74 millóns de euros netos, aos que se suman 28,5 procedentes de licenzas, acordos de desenvolvemento e royalties.
O presidente do grupo defendeu que, en relación ás complicacións derivadas da súa prescrición para o cancro de pulmón microcítico, a lurbinectedina presentou unha maior "seguridade" que o topotecán, o tratamento que se utiliza na actualidade.
En relación ao fármaco Aplidin, José María Fernández detallou que o socio da firma en Australia conseguiu a súa aprobación como tratamento para o mieloma múltiple en combinación con dexametasoma en cuarta liña e indicou que se espera que Nova Zelandia o recoñeza proximamente.
Ademais, avanzou que PharmaMar recorrerá ante a Comisión Europea a decisión de non autorizar a súa comercialización na UE.
