As raíces galegas da startup coa que o camión gaña ao avión

Unha parada nunha gasolineira de Berlín durante unhas vacacións en 2017 foi o xerme de todo. Da conversa de tres millennials con camioneiros españois naceu en maio de 2018 Trucksters, unha startup que ofrece un servizo de transporte de longa distancia full truck load (de carga completa) que marca a diferenza polo seu sistema de substitucións baseado na intelixencia artificial.

"En Berlín falamos con varios condutores españois que pasaban semanas fóra de casa, transportando mercancía por Europa. Ao contarnos como de dura era a vida por estrada chegamos á conclusión de que aplicando un sistema de substitucións poderiamos mellorar esta profesión, ademais de dar un servizo fantástico". Así o resume o pontevedrés Ramón Castro, que aos seus 30 anos é un dos tres cofundadores da compañía, na que ocupa o cargo de director de produto (CPO, polas súas siglas en inglés). 

A clave, di, é que o operador de transporte tecnolóxico que crearon permite aos grandes fabricantes levar os seus produtos por Europa funcionando "como unha aerolínea" a través de corredores. De feito, afinaron tanto o seu modelo que presumen de conseguir "tempos de transporte aéreo a custos de transporte terrestre" á vez que permiten dixitalizar totalmente as rutas. 

A intelixencia artificial, os algoritmos de optimización e o big data entran en xogo e permiten planificar os percorridos de tal xeito que os choferes que se somen a Trucksters poderán pasar máis tempo en casa. ¿Como? Intercambiando o semirremolque con outro camión para conducir a mercancía na dirección oposta. "Coas substitucións redúcese o tempo que pasan fóra do seu fogar e mellórase o servizo aos seus clientes, que pasa a ser máis rápido e eficiente en custos", explica o emprendedor. 

Os fundadores de Trucksters afinaron tanto o seu modelo que presumen de conseguir "tempos de transporte aéreo a custos de transporte terrestre" á vez que permiten dixitalizar totalmente as rutas

Tanto é así que, co seu sistema, logran realizar a ruta Madrid-Dortmund (Alemaña) en 24 horas, a metade do tempo habitual. Entre os seus clientes figuran desde industrias téxtiles ata operadores de paquetería que requiren dun servizo cunha "velocidade non-stop con medidas de seguridade adicionais".  

Licenciado en Enxeñería pola Politécnica de Madrid e con experiencia previa na consultora de estratexia de PwC Strategy&, onde desenvolveu modelos de optimización para empresas de transporte, Castro lanzou o proxecto con Luis Bardají (Madrid, 1993), o actual co-conselleiro delegado responsable de estratexia e vendas nacionais, e Gabor Balogh (Budapest, 1992), que se encarga da expansión internacional e da mercadotecnia.

DESEMBARCO EN GALICIA. Ademais de ocuparse do desenvolvemento da tecnoloxía e os algoritmos, o pontevedrés pilota agora a oficina que acaban de abrir na Coruña —que se suma á sede de Madrid e a delegación de Valencia—, desde a que aspiran a conformar un equipo de entre 20 e 40 traballadores no próximo lustro.

"As primeiras cinco incorporacións acometeranse este ano", indica o empresario, que admite que "está a ser todo un reto conseguir talento autóctono". Entre outros perfís, buscan enxeñeiros de cloud, de front-end e back-end, especialistas en software e desarrolladores de móbil Android cunha experiencia de entre tres e cinco anos. Castro, que recalca que tamén incorporarán a talentos "recentemente saídos da universidade", destaca que o traballo poderá realizarse en remoto "desde calquera parte de Galicia".

Na comunidade, Trucksters tivo entre os seus clientes a Estrella Galicia. De feito, Ramón Castro apunta que en 2018-2019 foi unha das seis startups premiadas na primeira edición de The Hop, o programa de emprendemento colaborativo da Corporación Hijos de Rivera cuxa finalidade é identificar as necesidades do sector a nivel dixital para procurar solucións innovadoras e acelerar o seu desenvolvemento.