O Supremo obriga a unha empresa de Vigo a recuperar a comida do Nadal

Conclúe que é un dereito adquirido. Un avogado cre que pode estenderse á cesta
Mesa de un restaurante. PIXABAY
photo_camera Mesa de un restaurante. PIXABAY

O Tribunal Supremo obriga a Domiberia, unha empresa que fabrica envases de hojalata, a recuperar a comida de Nadal para os traballadores da súa planta de Vigo. Logo de polo menos 30 anos invitando aos seus 350 empregados a un ágape por esas datas sinaladas, en 2019 a firma decidiu suprimilo. O comité de empresa advertiu á dirección de que non podería cancelalo de forma unilateral, sen previa negociación. Ante a negativa da empresa, os representantes do persoal acudiron aos tribunais.

Tras un longo periplo xudicial, o Supremo dálles a razón ao concluír que a comida do Nadal supón un dereito adquirido. Nun inicio, un xulgado do Social de Vigo deu a razón á empresa ao entender que a invitación á comida era un acto voluntario e que podería suprimila cando quixese. O comité recorreu e o caso chegou ao Tribunal Superior de Xustiza de Galicia, que estimou os argumentos do persoal. Sentenciou que, aínda que ningún dos 19 convenios colectivos aplicados na empresa fai mención a ese convite, "constitúe un acordo contractual tácito". A compañía non tirou a toalla e o conflito chegou ao Supremo, que nun auto contra o que non cabe recurso obriga a Domiberia a recuperar esa comida.

O avogado de CC OO que levou o caso, Ramón Hermida, sinala que a decisión do alto tribunal pode sentar precedente e estenderse á cesta de Nadal.

Comentarios