O presidente do comité de empresa de Alcoa Avilés, José Manuel Gómez de la Uz, considerou este luns que a planta que o fondo alemán Quantum Capital Partners ten en Hannover está moi optimizada e reflexa que "saben traballar perfectamente co aluminio reciclado". Gómez de la Uz encabeza a delegación de traballadores da planta de Avilés da multinacional estadounidense do aluminio Alcoa que este luns visitou as instalacións de Quantum.
"Véselles moita experiencia e unha capacidade bastante importante no sector, por iso estamos moi contentos con esta visita", declarou a Efe Gómez de la Uz, que este martes dirixirase á planta que a compañía ten en Venecia, que é moito máis grande que a alemá.
O fondo alemán Quantum Capital Partners quere seguir na carreira pola compra das fábricas de Alcoa de Avilés e A Coruña, e por este motivo invitou unha delegación de traballadores a visitar as súas instalacións.
Alcoa seleccionou a oferta de Parter Capital para seguir co proceso de venda das dúas factorías, en detrimento de Quantum, que en principio só está interesado na planta avilesina.
O Ministerio de Industria convocou para este martes en Madrid unha reunión para que o fondo suízo presente o seu proxecto aos gobernos de Asturias e Galicia.
