O prezo da vivenda de aluguer pechou o primeiro trimestre do ano na comunidade autónoma de Galicia cun incremento interanual do 4,3 % tras un ano de pandemia, segundo os datos que manexa o portal inmobiliario Fotocasa. Ao peche do primeiro trimestre de 2021, o incremento no prezo da vivenda en aluguer en Galicia foi do 0,6 %.
Estes descensos detectados en marzo sitúan o prezo da vivenda en aluguer en 7,24 euros por metro cadrado ao mes na comunidade galega, segundo a mesma fonte. No conxunto do Estado, o prezo da vivenda de aluguer pechou o primeiro trimestre do ano cun descenso interanual do 3,6 %. Con todo iso, en marzo o prezo medio da vivenda en aluguer situouse en 10,45 euros por metro cadrado ao mes, unha cifra que arroxa ademais unha caída trimestral do 1,9 %.
Segundo Fotocasa, en xaneiro de 2021 xa se detectou o primeiro parón do crecemento interanual no prezo da vivenda en aluguer logo de 66 meses de subidas en cadea (de agosto de 2015 ata decembro de 2020) pero non foi ata febreiro deste ano cando o prezo chegou a descender un 1,7 % por primeira vez. Xa que logo, nun ano de pandemia (de marzo de 2020 a marzo de 2021) o prezo do aluguer en España caeu en dúas ocasións ata chegar ao 3,6 % de marzo de 2021.
De acordo co portal inmobiliario, durante o primeiro trimestre de 2021 o prezo da vivenda en aluguer rexistrou en nove comunidades subidas trimestrais e en once interanuais. Con todo, ao longo de todo o ano de pandemia, o prezo da vivenda en aluguer experimentou continuos incrementos interanuais en varias rexións, sobre todo os meses de marzo e abril, onde o prezo subiu en todas elas.
A partir de xaneiro de 2021, os prezos empezaron a caer ata alcanzar descensos en oito comunidades, sendo os máis elevados os de Cataluña (8,7 %), Madrid (8,6 %), Canarias (5,9 %), Comunidade Valenciana (4,1 %), Baleares (3,4 %) e Andalucía (1,8 %). Doutra banda, as comunidades que máis descensos interanuais experimentaron neste ano de pandemia son Canarias (con 11 descensos), Baleares (10), Madrid (8), Cataluña (6), Comunidade Valenciana (3), País Vasco (2) e Andalucía (2).
Pola contra, os lugares nos que non se produciron descensos interanuais no primeiro ano de covid-19 foron Rexión de Murcia, Navarra, A Rioxa, Galicia, Estremadura, Castela-A Mancha, Castela e León, Cantabria, Asturias e Aragón. Ademais, no primeiro trimestre, os maiores incrementos interanuais do prezo do aluguer déronse na Rioxa (10,3 %), Asturias (8,4 %), Galicia (4,3 %) ou Castela e León (4,3 %).
