O ano 2019 consta de 14 días laborables que serán festivos, dentro dun calendario que contempla catro posibles pontes en Galicia e, incluso, tres macropontes de catro xornadas.
Segundo o calendario laboral elaborado pola Dirección Xeral de Emprego, as oito festas nacionais deste 2019 son o Ano Novo, Venres Santo (19 de abril), a Festa do Traballo (1 de maio), a Asunción da Virxe (15 de agosto), a Festa Nacional (12 de outubro), Todos os Santos (1 de novembro), o Día da Constitución (6 de decembro) e Nadal (25 de decembro).
Todas as comunidades excepto Cataluña e a Comunidade Valenciana celebrarán o Xoves Santo (18 de abril). En Galicia engádense dúas festividades autonómicas: o Día das Letras Galegas o 17 de maio —que este ano é un venres— e Santiago Apóstolo o 25 de xullo. E por outra banda, xa que a festa da Inmaculada Concepción (8 de decembro) cae en domingo, a Xunta traslada o día de libranza ao 19 de marzo, Día do Pai.
Deste xeito, a listaxe de festivos abre a porta a que os traballadores poidan gozar de catro pontes en Galicia como consecuencia de que o 1 de xaneiro, 17 de maio, 1 de novembro e 6 de decembro caen en luns ou en venres. A maiores, os máis afortunados poderán dispor de tres macropontes. A razón é que o 19 de marzo é martes e o 25 de xullo e 15 de agosto coinciden en xoves, polo que se poderían xuntar ao fin de semana.
Aos 12 días festivos nacionais e autonómicos hai que sumarlle dúas xornadas non laborables elixidas por cada municipio.
