Os expresidentes do Goberno e do PP José María Aznar e Mariano Rajoy participarán na convención nacional do partido, que terá formato itinerante e empezará en Santiago de Compostela o 27 de setembro para finalizar en Valencia o primeiro fin de semana de outubro.
Así o anunciou este mércores o secretario xeral do PP, Teodoro García Egea, nunha entrevista en Antena 3. Nas mesas da convención nacional non estarán só os expresidentes, senón tamén expertos da sociedade civil. O PP busca que esta convención sexa un "fito" para presentar a alternativa de Pablo Casado ao Goberno de Pedro Sánchez e mostrar ademais que ten as "portas abertas".
Egea non desvelou se o PP invitou ou non o exlíder de Ciudadanos Albert Rivera á convención, aínda que afastou a posibilidade de que asista cando sinalou que "hai persoas como Albert que pasaron pola política e que agora están concentrados noutra actividade profesional".
Sobre a pugna polo poder no PP madrileño, ao que a presidenta da Comunidade de Madrid, Isabel Díaz Ayuso, presentará candidatura e onde o alcalde da capital, José Luis Martínez-Almeida, non descartou competir, Egea defendeu que o modelo actual, cunha terceira figura (a de Pío García Escudero), "funciona".
Asegurou que como secretario xeral non pode prohibir que ninguén concorra, pero o partido é "un medio para obter un fin" e nestes momentos non se poden dedicar aos congresos, senón a gañar "as eleccións".
