O presidente do Consejo General de Colegios Oficiales de Médicos (Cgcom), Serafín Romero, defendeu a urxencia de realizar unha profunda revisión das grandes leis sanitarias e avogou por despolitizar "a xestión do sanitario".
Durante unha conferencia pronunciada no Club Siglo XXI, co título Ante a Covid-19: O Cgcom comprometido coa sociedade e co médico. 100 anos de vida, Romero recordou o compromiso da corporación médica coa sociedade e avanzou as estratexias e liñas de acción nas que traballa a organización tras a pandemia.
"Un dos maiores retos é desde o punto de vista organizativo e aí é onde máis se precisa a contribución da profesión médica; porque o regreso á normalidade vai ser presumiblemente un camiño complexo, con altibaixos, con idas e vindas", dixo o responsable dos colexios de médicos.
Por iso, considera que "sen un desenvolvemento efectivo de políticas de recursos humanos en sanidade que reforcen e instrumentalicen formas de recoñecemento, promoción e mellora das condicións de exercicio profesional e laboral, non é posible pretender un sistema sanitario moderno, eficaz e humanista". Neste sentido, avogou por unha nova "onda reformista que facilite cambios institucionais e organizativos e tamén para prepararnos para futuras ameazas".
O Cgcom cre preciso incorporar "a saúde pública, a atención primaria e o sector sociosanitario como compoñentes básicos do conxunto funcional do sistema".
Nesta situación de urxencia e ante a falta dun plan específico tivéronse que dar "respostas improvisadas, pero valiosas", rompendo as "reticencias, inercias e barreiras procedimentais habituais" e permitindo cambiar en días a organización dos centros, dixo.
Durante a súa intervención, o presidente dos colexios médicos reclamou unha "profunda revisión das nosas grandes leis sanitarias para adaptalas aos cambios sociais producidos" e pronunciouse a favor de que as políticas de saúde pública se enmarquen nun "Ministerio de Sanidade, Saúde Pública e Política Social", cunha xestión vinculante das decisións do consello interterritorial.
