A Audiencia de Valladolid condenou a 27 anos e 11 meses de cárcere a Davinia M.G., a nai da nena de 4 anos Sara, e a prisión permanente revisable á súa parella, Roberto H.H., polo asasinato da pequena en agosto de 2017 tras sufrir violación e malos tratos continuados. A sentenza, notificada este mércores, establece a condena para a nai da menor por comisión por omisión, o que supón non protexer da forma en que debía a súa filla, e considera ao procesado autor material dos feitos.
A resolución xudicial, asinada polo presidente da Audiencia Provincial de Valladolid, Feliciano Trebolle, baseouse no veredicto do xurado popular que deliberou sobre o caso e fixo pública a súa decisión o pasado 25 de maio. En concreto, o fallo impón prisión permanente revisable para o compañeiro sentimental da nai da pequena no momento dos feitos por un delito de asasinato —e non homicidio—, xa que foi cometido con aleivosía —a nena non puido defenderse— e con ensañamento.
Fixa tamén para Roberto H.H. 22 anos de prisión por catro delitos de malos tratos a persoa especialmente vulnerable, un delito de malos tratos habituais e outro de agresión sexual a menor de 16 anos, e considera que en todos concorre a circunstancia agravante de odio pola orixe romanesa da nena.
Roberto H.H. é o décimo condenado a prisión permanente revisable
Pola súa banda, a condena para a nai de Sara establece 25 anos de prisión como autora por comisión por omisión do delito de asasinato, con aleivosía pero non con ensañamiento neste caso. Por tres delitos de malos tratos con lesións e un de malos tratos habituais, a Audiencia establece dous anos e once meses de prisión para Davinia M.G., como autora igualmente por comisión por omisión.
En todos os delitos, para a proxenitora da pequena aplicáronse as atenuantes de obcecación e confesión que apreciaron os membros do xurado popular.
Os dous procesados deberán indemnizar de xeito conxunto ao pai da nena con 85.000 euros, e á súa irmá, que tiña 12 anos cando ocorreron os feitos, con 70.000 euros.
O maxistrado presidente non priva da patria potestade á condenada en relación coa irmá de Sara nin lle prohibe comunicarse con ela ao aplicar a xurisprudencia do Tribunal Supremo, que esixiría para iso que a outra filla de Davinia M.G. sufrise os feitos ou presenciado os mesmos, ademais de que a acusada non foi considerada autora material dos delitos.
Roberto H.H. é o décimo condenado a prisión permanente revisable, que foi incluída no Código Penal en 2015 co apoio do PP e recorrida ante o Tribunal Constitucional, que aínda non se pronunciou. En Castela e Léon é o primeiro.
