O movemento feminista convocou para o 8-M, Día Internacional da Muller, unha folga xeral, laboral, estudantil, de coidados e de consumo, contra a violencia e a desigualdade que sofren as mulleres en todos os ámbitos.
En canto á folga laboral, CC OO e UXT convocaron paros de dúas horas por quenda, de 12.00 a 14.00 horas nas quendas de mañá, de 16.00 a 18.00 horas nos de tarde e as dúas primeiras horas da quenda para os de noite, aínda que a convocatoria de UXT dá cobertura legal tamén para as 24 horas.
A partir deste escenario, isto é o que hai que saber para secundar a folga:
- Todos os traballadores asalariados, mulleres e homes, poden facer a folga, xa que a convocatoria non pode discriminar por razón de sexo, a pesar de que o movemento feminista chama a facer folga só ás mulleres.
- Todos os empregados por conta allea (non autónomos) teñen dereito a secundala independentemente do tipo de contrato laboral que teñan ou de se están subcontratados a través dunha empresa de traballo temporal.
- A folga poderá seguirse polo tempo que cada traballador elixa, en todos os sectores de actividade e en todo o territorio do Estado.
- Facer folga é un dereito que non pode ter represalias, salvo se o traballador forma parte de servizos mínimos.
- Facer folga non sae gratis, de maneira que se suspende o contrato laboral durante o período que non se traballa e no que a empresa non está obrigada a pagar nin o salario nin a cotización á Seguridade Social.
- Non hai obrigación legal de comunicar á empresa se se vai a facer folga. No caso de que a empresa necesite sabelo para garantir o dereito a traballar dos empregados que non fagan folga, hai que ter en conta que non é unha decisión vinculante e que se pode cambiar de opinión sen necesidade de informar.
- Estudantes en prácticas e bolseiros poden facer folga se teñen un contrato cuberto pola Seguridade Social, posto que o dereito a folga só está recoñecido no ámbito das relacións laborais.
- As empregadas do fogar, encadradas nun réxime laboral especial, teñen dereito a folga pero con maiores dificultades, xa que a persoa empleadora ten a capacidade de romper o contrato sen dar ningún motivo (desestimento). Ademais, no exercicio do dereito á folga non se poden deixar desprotexidos a nenos, maiores ou persoas dependentes.
