"Todos os datos apuntan que dobregamos a curva" da incidencia do covid-19, asegurou este venres en Palma a ministra de Sanidade, Carolina Darias, quen, no entanto, apelou á prudencia respecto ao fin da sexta onda da pandemia.
Darias, que visitou o hospital Son Llàzer de Palma acompañada da consellera de Saúde balear, Patricia Gómez, destacou que na onda dominada pola variante ómicron, a pesar de que a incidencia se multiplicou por sete respecto da terceira onda, ocorrida hai un ano, "a hospitalización, as Uci e os falecementos son moi inferiores".
Esta diferenza, subliñou, explícase pola "altísima cobertura vacunal" e pola menor virulencia da variante ómicron.
A ministra sinalou que, en coordinación coas comunidades autónomas e coas institucións europeas, o seu departamento traballa no deseño dunha nova fase de contención do covid-19 na que se pase "da vixilancia da urxencia a unha vixilancia por obxectivos, e de máis calidade que a actual".
Darias visitou Son Llàtzer, o menor dos dous hospitais públicos da capital balear, para coñecer algúns dos equipos que se substituirán co plan de investimentos tecnolóxicos do ministerio, dotado con 795 millóns de euros, dos que Baleares recibirá 22 millóns.
Como xa explicaron este xoves o ministerio e o Govern balear, o plan permitirá renovar ou ampliar 21 equipos de alta tecnoloxía sanitaria nos hospitais de Son Espases, Son Llàtzer, Can Misses e os comarcais de Inca e Manacor.
