Barcelona viviu este venres a cuarta noite consecutiva de altercados, que recruaron con respecto ás xornadas anteriores con barricadas e destrozos e un balance de máis de medio cento de feridos nos enfrontamentos de manifestantes coas forzas de seguridade, que por primeira vez empregaron a tanqueta de auga. Pasada a medianoite, tras máis de sete horas de enfrontamentos, os disturbios baixaron de intensidade.
A violencia embazou as chamadas Marchas pola Liberdade que este venres, coincidindo cunha xornada de folga xeral, confluíron na capital catalá nunha masiva manifestación en Paseo de Gracia, de carácter festivo e pacífico, que comezou sobre as 17.00 horas e reuniu máis de medio millón de persoas segundo a Garda Urbana para rexeitar as condenas do caso do procés. Os participantes foron uns 750.000 segundo os organizadores.
A esa hora, moito máis cedo que días anteriores, comezaron as expresións de violencia, alleas á masiva manifestación. Foi en Via Laietana, preto da Xefatura da Policía Nacional. Alí se produciron os primeiros choques entre Policía e concentrados, que comezaron a montar barricadas con lumes e lanzaron aos axentes pirotecnia, pedras, botellas de vidro e outros obxectos contundentes.
A policía respondeu con cargas, ata que os manifestantes —varios centos— se repregaron na praza Urquinaona. Alí levantaron novas barricadas con lume e a Policía Nacional respondeu arroxando botes de fume, gases lacrimóxenos e pelotas de goma contra os manifestantes.
A alta intensidade dos disturbios levou a despregar por primeira vez a tanqueta de auga dos Mossos d'Esquadra, coa que accederon por Via Laietana para abrir paso aos vehículos policiais entre as barricadas que ocupaban a calzada.
Tras o paso da tanqueta, que non lanzou chorros de auga contra os manifestantes, estes dispersáronse e montaron novas barricadas en diversos puntos da cidade, como praza Urquinaona, Rolda Sant Pere, Arco de Triunfo, Paseo Lluís Companys ou Gran Via.
Ante o lume que ameazaban con estenderse a árbores, algúns veciños saíron das súas casas para tratar de reducilo con bidóns de auga, mangueiras e extintores.
Na Rolda Sant Pere, tamén se rexistraron danos nunha sucursal bancaria, mentres que en Praza Cataluña os manifestantes arrincaron tapas de sumidoiros e tiráronas contra as ventás de El Corte Inglés.
Pasada a medianoite, tras máis de sete horas de enfrontamentos, os disturbios baixaron de intensidade. Con todo, aínda se podían ver barricadas e desfeitas nalgunhas rúas do centro. Os manifestantes que se enfrontaron coa policía deixaron a praza de Urquinaona e Via Laietana chea de lastros que arrincaran das beirarrúas e lanzado contra os axentes.
Os Mossos d'Esquadra informaron de que durante os altercados foron detidas polo menos 31 persoas. Como nas últimas noites, numerosos xornalistas cubrían sobre o terreo os altercados e a Policía Nacional detivo a un fotógrafo do diario El País.
Feridos
En canto aos feridos, a maioría deles, 60, rexistráronse en Barcelona, segundo os datos facilitados polo Sistema de Urxencias Médicas (SEM) ás doce da noite do venres.
Nos incidentes rexistrados tras as manifestacións e marchas pacíficas contra a sentenza do procés, unha persoa sufriu unha contusión facial e outras tres contusións oculares.
Na capital catalá, onde os enfrontamentos foron de maior gravidade, foron atendidos 60 feridos, 12 en Xirona, 6 en Tarragona e 6 en Lleida.
En strong Xirona os incidentes comezaron despois de que dúas furgonetas da Policía Nacional aparecesen onde se celebraba a multitudinaria manifestación contra a sentenza do procés. A última hora do día, centos de manifestantes reuníronse nunha zona coñecida como A Copa, unha explanada que se atopa na entrada de Xirona, onde se sucederon os enfrontamentos e os Mossos d'Esquadra efectuaron varias cargas.
En Lleida, ao acabar o día os enfrontamentos e a violencia tamén fixeron a súa aparición na praza da Paeria e os seus arredores.
En Tarragona, tras a manifestación multitudinaria e festiva, unhas 500 persoas dirixíronse á Subdelegación do Goberno e comezaron a lanza obxectos e pirotecnia. Tamén alí houbo cargas.