España enviou este luns a dous avións anfibios e un equipo de catro militares da Unidade Militar de Urxencias (UME) a Portugal para axudar a combater os incendios que azoutan o centro de Portugal.
Trátase de dous avións anfibios Canadair, pertencentes ao Ministerio de Agricultura, Pesca e Alimentación (MAPA) tripulados por pilotos do Exército do Aire e cuxas manobras serán coordinadas desde terra polos catro efectivos da UME, informaron a Efe fontes da unidade.
COLABORACIÓN. Os avións, que partiron na tarde deste luns cara á zona de Vila de Rei, do distrito de Castelo Branco, rexión de Centro, teñen capacidade para cargar 6.000 litros de auga en 12 segundos planeando sobre a auga e descargar nunha ou varias etapas.
Os Canadair traballan só en horas diúrnas, polo que á tardiña regresarán cada día á súa base de Salamanca, onde están desprazados como parte do operativo de verán.
En total, España canta con 18 avións anfibios, aínda que actualmente só están dispoñibles 11, que se atopan repartidos por todo o territorio nacional.
O Ministerio de Administración Interna de Portugal informou por medio dunha nota que solicitou axuda a España a través do protocolo existente entre os dous países ibéricos sobre cooperación técnica e asistencia mutua en materia de Protección Civil.
A colaboración no combate aos incendios entre Portugal e España, dous dos países europeos máis castigados polo lume, é habitual, destacou o departamento portugués.
INCENDIOS. O incendio en Vila de Rei, que se declarou o pasado sábado, estendeuse ao municipio veciño de Mação e aínda non foi controlado a pesar de que máis de mil bombeiros combaten as chamas coa axuda de 14 medios aéreos: 9 avións e 5 helicópteros.
A situación complicouse durante a tarde con moitas reactivacións e novas frontes, coa preocupación de que as chamas avancen cara a aldeas como as de Roda ou Chaveiras, informaron fontes portuguesas.
As chamas, que avanzaron uns 25 quilómetros desde o sábado, arrasaron máis de 6.000 hectáreas e deixaron uns 30 feridos, aínda que só un permanece en estado de máxima gravidade, en coma inducido.
