O presidente de Galicia, Alberto Núñez Feijóo, declarou este xoves que, se ao presidente do Goberno en funcións, Pedro Sánchez, non lle interesa un pacto con Podemos para formar Goberno, debería mirar ao resto da Cámara e buscar unha solución, polo que propuxo unha hipótese de coalición "de goberno" ou "pacto de lexislatura" entre o PSOE e o PP.
"Sánchez tería que falar co resto da Cámara e dicirlle ao PP 'propóñolle unha coalición de goberno', unha gran coalición no noso país porque non me fío de Podemos. Chamaría ao PP e proporíalle unha coalición de goberno ou un pacto de Lexislatura", declarou nunha entrevista en Onda Cero, recollida por Europa Press, aludindo ao que fixo Mariano Rajoy con Pedro Sánchez en 2016.
Así mesmo, o presidente da Xunta criticou que o país estea xestionado actualmente por asesores e non por políticos e que esta situación estea a derivar nun "colapso" intencionado por parte do Goberno en funcións, para facilitar a investidura de Pedro Sánchez.
COLAPSAR E TENSIONAR A POLÍTICA. Sen mencionar a ninguén, Feijóo afirmou que "alguén" asesorou a Sánchez para "colapsar e tensionar a vida política" e forzar a investidura, pero "fóiselles das mans". "Quen está a asesorar a Sánchez para que colapse o país e así favorecer a súa investidura, está a danalo e estalle mentindo", sinalou.
O dirixente popular declarou que a vida política española está metida nun "carrusel" que empeza a producir un "certa fartura" nas persoas que cren que un país debe estar dirixido por políticos e non por asesores.
"Cando a política se basea en guións e series de televisión, está moi ben para a ficción e entreter, pero no Goberno non se está para entreter, senón para resolver problemas", criticou Feijóo de forma irónica.
UNHA REPETICIÓN ELECTORAL DRAMÁTICA. Cuestionado por se unha repetición electoral sería dramática para as comunidades autónomas, que están á espera de ingresar o diñeiro recadado por cada autonomía, Feijóo recoñeceu que "si" porque falta "moitísimo diñeiro".
"Non podemos pedirlle aos pacientes que non vaian aos hospitais porque o Goberno está en funcións", criticou sobre a incapacidade o Executivo en funcións de repartir o diñeiro correspondente ás autonomías.
Para rematar, insistiu en que se dea o diñeiro que "xa está recadado" e que permanece na "caixa do ministerio", correspondente ao 50% de IVE e 50% de IRPF que recadou cada comunidade autónoma.
