O expresidente do Goberno Felipe González acusa ao exsecretario xeral do PSOE Pedro Sánchez de estar máis interesado no partido que na marcha do país e, de feito, dúbida que poida falar durante "máis de media hora" sobre as súas propostas para España.
Deste xeito refírese González ao exlíder do PSOE, de quen non falara en público logo da súa dimisión e posterior marcha do Congreso. E faino nunha entrevista na revista francesa Politique Internationale, recollida por Europa Press, cando se lle pregunta se considera que Sánchez soubo propor "unha visión para España".
"Non o sei", comeza respondendo González que, despois, e tras subliñar que non se trata de falar de discursos como os do expresidente Charles De Gaulle, engade que non está seguro que Sánchez poida falar durante "máis de media hora" sobre o que se pode facer polo país. "Creo que se interesa moito máis polo seu partido que polo país", remacha.
O expresidente lamenta que ao PSOE xa non se lle perciba como "unha forza de progreso capaz de defender e restaurar os dereitos sociais"
Na entrevista, o expresidente lamenta que o PSOE "perdeu a súa vocación maioritaria" e admite que está "en crise" e que xa non se lle percibe por parte dos cidadáns como "unha forza de progreso capaz de defender e restaurar os dereitos sociais". "Paradoxicamente, está máis en competencia con Podemos, que, por outra banda, practica a estratexia da pinza co PP, que co propio PP", lamenta.
González analiza tamén o xurdimento dos dous novos partidos e apunta que é "evidente" que o PP axudou dalgún xeito a Podemos a ter presenza nos medios de comunicación para así debilitar ao PSOE. "Enfrontado a unha erosión do seu electorado, o PP buscou reducir o espazo do seu principal adversario", sinala.
CRÍTICO CON PODEMOS. A partir de aquí, o expresidente móstrase tamén moi crítico con Podemos, de cuxos dirixentes di que viron a sociedade "como un laboratorio" no que podían levar a cabo "experimentos". "E fixérono con moita intelixencia, demostrando o seu perfecto dominio das redes sociais e dos grandes medios", afirma.
González pon en dúbida ademais que a forza de Podemos sexa a do seu secretario xeral, Pablo Iglesias, pero si subliña que ten o poder deste partido porque é a única cabeza coñecida. "Ten unha concepción do poder extremadamente vertical, xerárquica. A nivel das propostas, é un Toni Negri, un Lenin 3.0, un Hugo Chávez... pero o movemento que dirixe componse dunha multitude de grupos que funcionan de xeito horizontal, de persoas que teñen unha visión diferente, máis social-demócrata, menos leninista, que razoan con calma e de xeito máis estratéxico", afirma.
Considera que Podemos está formado por "grupos" que "teñen unha visión diferente, máis social-demócrata, menos leninista" que o líder da formación, Pablo Iglesias
O expresidente insiste na súa crítica a Iglesias e apunta que se se fixese unha montaxe en vídeo coas posicións que foi adoptando de xeito sucesivo durante os últimos anos, "o fío do seu pensamento sería incomprensible" porque dixo "de todo e o seu contrario".
Ao principio, recorda, os fundadores de Podemos querían terminar coa vella política, incluíndo o comunismo, do que procedían. Pero despois fixeron unha coalición con Esquerda Unida e, ao "perder unha parte do seu electorado", comezaron a reflexionar.
E continúa cunha reflexión que sabe que vai "enfadar" a Podemos, pero que considera que é veraz. Ao seu xuízo, "se se analizan os elementos máis identificables do discurso de Marine Le Pen e os elementos máis identificables do discurso de Podemos, constátanse certas similitudes nos temas, en particular na oposición entre os de abaixo e os de arriba", entre "o pobo e as elites".
