O adestrador do Manchester City, Pep Guardiola, volveu manifestarse a favor da causa independentista en Cataluña mediante un vídeo subido nas redes sociais para comparar o lazo amarelo que leva habitualmente na súa roupa co lazo solidario contra o cancro ou calquera outra enfermidade.
O técnico catalán, que se mostrou a favor da celebración dun referendo sobre a independencia de Cataluña en repetidas ocasións, aparece no vídeo cunha camiseta de cor amarela para pedir a "liberdade" dos políticos cataláns encacerlados tras o procés que culminou coa convocatoria ilegal do pasado 1 de outubro e unhas novas eleccións.
O exxogador do FC Barcelona defendeuse daqueles que lle critican por levar o lazo amarelo pondo como exemplo o ocorrido recentemente nun torneo de golf. "Hai unhas semanas, os mellores golfistas do mundo, incluído Tiger Woods xogaron un torneo en Estados Unidos e aquel fin de semana levaron un lazo amarelo. *Por que? Porque Jarrod Lyle, un golfista, estaba a loitar contra un duro cancro", recordou.
"Os xogadores portaban o lazo amarelo para estar preto de Jarrod e a súa familia. Estes xogadores sensacionais demostraron a súa humanidade ao resto do mundo. Unha situación parecida ocorre en Cataluña nos últimos meses. Miles de persoas levan un lazo amarelo para demostrar a súa humanidade, porque mulleres e homes están en prisión desde hai un ano", indicou nun vídeo que se pode escoitar en inglés, italiano, alemán e catalán.
"É xente normal que defende ideas e que está na prisión desde hai un ano. Para todos os que esteades en Cataluña o 11 de setembro, a todos os amigos de Cataluña, agradecémosvos que podades transmitir esta mensaxe a Europa e todo o mundo. Liberdade a todos os que están no cárcere. Oxalá poidan volver a casa", sentenciou a seis días de que se celebre a Diada.
