O líder de Cs en Castela e León e membro da Executiva nacional do partido, Francisco Igea, defendeu este martes a alternativa dunha abstención que permita a investidura do socialista Pedro Sánchez para que "o país non dependa en exclusiva" dos nacionalistas.
Nunha rolda de prensa convocada para analizar a situación interna do seu partido tras a dimisión de Toni Roldán e o seu voto discrepante sobre a estratexia de Ciudadanos de non negociar co PSOE unha alternativa a nivel nacional, Igea criticou que entre os socialistas non haxa voces discrepantes que cuestionen os acordos do seu partido con nacionalistas a nivel autonómico e local.
Igea rexeitou este martes que "a carga da proba" sobre un acordo cos socialistas recaia sempre en Ciudadanos e afirmou que "non hai un só Toni Roldán no PSOE, só hai Ábalos".
ADOLESCENCIA. Igea foi un dos catro membros do partido que votaron en contra do veto a negociar con Pedro Sánchez e asegurou que non vai abandonar a formación laranxa e engadiu que "a adolescencia é unha crise necesaria".
"Non abandonarei o meu partido", dixo en rolda de prensa Igea, na que engadiu que en Ciudadanos "a crítica é posible sen temor a nada".
