Axentes da Policía Nacional detiveron un home de 46 anos e de orixe húngara por presuntos malos tratos e detención ilegal á súa parella, unha muller que faleceu no incendio dun edificio en Es viver, o pasado 14 de maio. O home retiña con cadeados á muller cando el saía de casa. Tiña antecedentes e convivía con ela fai preto de tres anos, segundo informou a Policía Nacional nun comunicado.
No transcurso da investigación para aclarar as causas do incendio, a policía pescudou a existencia de posibles malos tratos e detención ilegal por parte do detido á súa parella. A muller podería ser a persoa falecida, a quen aínda non se puido identificar plenamente, á espera do resultado das probas de ADN.
Por mor das entrevistas que a policía xudicial realizou no lugar dos feitos, detectouse que algunhas testemuñas mencionaron que na zona onde apareceu o cadáver, vivía unha parella na que se daban episodios de malos tratos, que incluían o feito de que o home adoitaba deixar encerrada na vivenda á muller, cando saía da casa, mediante a colocación de cadeados. A policía tomou declaración a testemuñas e na inspección ocular realizada por especialistas de Policía Científica atopáronse cadeados na zona.
Ademais, comprobouse que a vítima sufrira malos tratos por parte do detido, que provocou que se ditase unha orde de protección, que estivo en vigor dous anos. Tamén se constatou dúas detencións por estes feitos. A investigación policial para aclarar as causas do incendio continúan abertas. O individuo pasou a disposición xudicial nas últimas horas e o xulgado decretou liberdade provisional.
