A primeira fase da operación especial de Tráfico con motivo do Nadal, na que se prevén 6.700.000 desprazamentos, arrincou ás tres da tarde deste venres con importantes retencións, de ata nove quilómetros, en todas as principais saídas de Madrid e de Barcelona.
Segundo informa a Dirección Xeral de Tráfico (DXT), as retencións na capital de España afectaban a esa hora da tarde á A-1 na saída de Madrid e ao seu paso pola localidade de Alcobendas; na A-2 na saída da cidade e en San Fernando de Henares -ata cinco quilómetros-, así como na M-45 tamén neste último municipio.
A circulación era complicada na A-6 en Pozuelo e Las Rozas; tamén na A-3 preto de Rivas Vaciamadrid; na A-5 en Móstoles e Alcorcón e na A-4 nos primeiros quilómetros de saída da capital, aínda que a M-40 rexistraba os peores atascos na cidade, con retencións que ían dos cinco ata os nove quilómetros nalgúns tramos.
Nas inmediacións de Barcelona, existían importantes retencións en varios puntos das estradas de circunvalación B-10 e B-20 á saída da Cidade Condal, na C-58 en Montcada i Reixac así como na A-2 en Sant Joan Despi.
Tamén había problemas circulatorios en Sevilla na A-92, na N-630 e principalmente na S-30, que adoita aglutinar a maior parte das retencións na cidade ao comezo da fin de semana; mentres que en Valencia as complicacións localizábanse na V-30 e na V-31 á altura do municipio de Alfafar.
No resto das grandes cidades españolas, non había grandes problemas de circulación ás tres da tarde.
A Dirección Xeral de Tráfico prevé 17 millóns de desprazamentos por estrada durante o Nadal, período para o que despregou un dispositivo especial de seguridade viaria que incrementa os controis de alcol, drogas e velocidade, desde as tres desta tarde ata o día de Reis.
Segundo informa a DXT, o operativo desenvolverase en tres fases coincidindo cos principais días festivos, Nadal, Noitevella e Reis, con incremento dos citados controis dentro do plan integral de vixilancia en estradas convencionais que se está levando a cabo.
A primeira fase, a de Nadal, desenvolverase desde hoxe ata o día 25, período para o que están previstos 6.700.000 desprazamentos; a de Fin de Ano prolongarase desde o día 26 ata o 1 de xaneiro e a de Reis desde o 2 ao 6 de xaneiro.
