A Policía identifica a 6 menores da malleira a unha nena de Palma

Seis menores da ducia de estudantes que o pasado mércores propinaron unha malleira a unha nena de 8 anos no colexio público Anselm Turmeda de Palma xa foron identificados pola Policía Nacional, que este domingo realizou un chamamento "á calma e á serenidade".

Nun comunicado, a Policía informa de que, ante a "gravidade dos feitos", concluíu a primeira fase da investigación da agresión a esta menor, que no recreo da mañá do mércores foi inmobilizada e pateada por unha ducia de mozos de entre 12 e 14 anos, despois de que ela collese o balón co que xogaban ao fútbol porque soara o timbre que lles anunciaba a volta ás aulas.

Esta primeira fase foi desenvolvida pola Unidade da Familia (UFAM), dependente da Brigada Provincial de Policía Xudicial. Os axentes entrevistaron desde o pasado venres e este fin de semana a varias decenas de persoas e identificou a seis presuntos agresores, todos eles menores de 14 anos e, xa que logo, inimputables penalmente.

Por razóns xurídico-técnicas, sinala a Policía, a exploración dos mozos será efectuada pola Fiscalía de Menores, que é a encargada de tramitar o expediente, e ante a cal se presentará todo a información que reúna a Policía Xudicial.

Ademais, a Policía congratúlase de que a menor agredida non presente lesións graves e reciba a alta médica. Sen "minimizar un feito de significativa gravidade", aínda baixo investigación, a Policía realizou un chamamento "á calma e á serenidade" porque algunhas manifestacións e rumores ao redor deste caso son "inexactos e dun ton elevado, o que incrementa a preocupación e a tensión dos pais e alumnos de forma innecesaria".

A Policía Nacional, asegura, fixo un "importante esforzo para avanzar" na investigación e continuará despregando axentes nos próximos días na zona do colexio para o restablecemento da normalidade. Ademais, ofrecerase á dirección do centro a posibilidade de impartir charlas nas que se darán consellos aos nenos sobre o acoso escolar, os riscos de internet e doutras materias, dentro do Plan Director para a mellora da convivencia na contorna escolar.