A Policía Nacional liberou a unha moza, de 15 anos, que estaba amordazada no soto dun local do madrileño barrio de Carabanchel e detivo ao presunto autor da retención, segundo informaron este xoves fontes policiais.
O suceso ocorreu o mércores pola tarde cando, nun descoido do seu captador, a vítima puido porse en contacto cos servizos policiais.
A moza facilitou aos policías o lugar onde se atopaba, aínda que os datos que achegou non eran correctos. Logo de máis dunha hora de procura e batidas pola zona, os axentes localizaron un local, nun fondo de saco, onde podería atoparse a moza.
Cando chegou o dispositivo policial, este establecemento de lecer estaba pechado e con música de fondo a todo volume.
Os policías baixaron ao soto, onde atoparon á menor amordazada con cinta americana e atada con cables a unha cadeira e liberárona.
A Policía Nacional detivo ao presunto autor dos feitos, de 36 anos, que tiña unha actitude violenta e estaba armado cun serrucho, un martelo e un desaparafusador.
As primeiras pescudas apuntan a que este home coincidiu hai uns días coa moza e o seu grupo de amigos nunha festa. Ao parecer, desaparecéronlle varios obxectos persoais e acusou á menor e aos seus coñecidos e ameazoulles para que llos devolvesen. Cunha escusa quedou coa moza e despois retívoa de forma ilegal.