A ministra de Sanidade, Carmen Montón, non aprobou todo o seu máster na convocatoria de xuño de 2011 xa que, segundo consta na súa ficha de alumna, polo menos nunha materia aparecía cun "non presentado" cando acabou o curso que ela defende que superara, segundo publica este martes eldiario.es.
O diario sostén que o 25 de novembro dese ano "alguén entrou no sistema informático" da Universidade Rei Juan Carlos (URJC) e cambiou ese non "presentado" por un "aprobado", a pesar de que as actas do curso xa estaban pechadas.
A ministra asegura que presentou o seu traballo de fin de máster sobre estudos de xénero en xuño de 2011, o que, segundo eldiario.es, sería fraudulento porque nese momento non tiña todas as demais materias aprobadas.
A modificación de nota fóra de prazo explicaría por que o título oficial de Montón di que o completou en 2012: "Porque lle aprobaron a última materia nese curso académico".
eldiario.es informa de que non é a primeira vez que un máster do instituto universitario que dirixía Enrique Álvarez Conde presenta unha irregularidade deste tipo, xa que o mesmo ocorreu coa expresidenta madrileña Cristina Cifuentes e a funcionariaAmalia Calonge, que modificou as notas a posteriori para cambiar un "non presentado" por outra nota.
Montón negou este luns calquera irregularidade na obtención do seu máster na URJC: "Non cometín ningunha irregularidade" e "non ten nada que ver con outros desgraciados casos" aseverou nunha rolda de prensa na que defendeu que dispón de numerosa documentación que acredita que cursou o máster e que sente o "respaldo do presidente" do Goberno, Pedro Sánchez.
