A portavoz do Goberno, Isabel Celaá, asegurou este venres que as reunións do titular do Executivo, Pedro Sánchez, cos presidentes autonómicos empezarán "antes do verán" e o primeiro encontro será co lehendakari, Íñigo Urkullu, seguido do president catalán, Quim Torra.
Na rolda de prensa tras o Consello de Ministros, o segundo deste Goberno, Celaá explicou que estes encontros se farán por orde de antigüidade dos Estatutos de Autonomía das distintas comunidades, polo que, tras Urkullu e Torra continuarán co presidente de Galicia, Alberto Núñez Feijóo, e a de Andalucía, Susana Díaz.
Segundo recordou Celaá, o venres pasado nada máis concluír a reunión do Consello de Ministros, Sánchez púxose en comunicación telefónica cos presidentes das distintas autonomías para iniciar "en breve" esta rolda de contactos e a primeira será con Urkullu.
Sobre o contido destes encontros e se Sánchez atenderá ás distintas demandas, como as expostas pola presidenta navarra Uxue Barkos, entre outros, Celaá limitouse a constatar que das reunións derivará "unha axenda determinada" para proceder a mellorar, "acordar e dialogar" coas distintas comunidades.
Ademais, servirán de punto de partida para un "capítulo de actuacións" entre o Goberno de España e as autonomías, a través dun diálogo que "debe de ser moi valorado", destacou Celaá, porque "estivo bastante pechado" ata agora.
CRÍTICA DE TORRA. O presidente da Generalitat, Quim Torra, reclamou este venres unha relación "bilateral" co Goberno de Pedro Sánchez, ao que reprochou que sitúe a Cataluña no "paquete das comunidades autónomas" á hora de establecer a orde de recepción dos presidentes rexionais.
