A polémica aberta por Podemos ao redor das doazóns do fundador de Inditex Amancio Ortega segue aberta. A número dous da formación morada, Irene Montero, sinalou este luns que a sanidade non necesita que ningún "supermillonario" veña a decidir se hai boas máquinas ou non para curar o cancro.
Nun acto político celebrado no municipio de Rivas baixo a lema Feminismo para vivir, feminismo para transformar, Montero comezou a súa intervención agradecendo á candidata á presidencia da Comunidade de Madrid que sexa clara dicindo "que a sanidade non se vende" e que merece "respecto".
Ademais, apuntou que o debate suscitado non vai de se unha persoa como Ortega é "un bo home", senón de quen decide cales son as prioridades da sanidade pública. "Quero que a sanidade pública do meu país teña as mellores incubadoras, as mellores maquinas para tratar o cancro, os mellores profesionais pagados como se lles debe pagar", sinalou.
Así, esixiu que ningún supermillonario decida se hai boas máquinas ou non para tratar determinadas enfermidades, e avogou porque isto dependa dunha decisión democrática "e non do capricho" dunha persoa. Respecto diso apuntou ademais que, aínda que o que defenden é unha verdade incómoda, esta é "a base da democracia".
CRISE CIVILIZATORIA. Montero afondou no debate suscitado sinalando que detrás hai outro máis profundo, que é o da crise social ou crise civilizatoria. Neste sentido, asegurou que está en xogo "o que significa vivir en sociedade, ter vidas dignas e como organizarse para garantir os dereitos de todos".