Portugal celebrou este martes a recuperación da "xestión normal" da fronteira con España tras dar por superado o que considerou un "lapso" das autoridades españolas os controis no acceso terrestre ao territorio español.
Como "un lapso técnico" cualificou o presidente luso, Marcelo Rebelo de Sousa, a esixencia por parte de España dun test de diagnóstico, certificado de recuperación ou de vacinación para entrar por terra no seu territorio.
Un "lapso" que xa foi aclarado por parte das autoridades españolas, agregou. "Comezamos o día cunha boa noticia", incidiu o presidente.
"As autoridades españolas foron moi rápidas e responderon con prontitude aos nosos pedidos de aclaración", explicou o ministro de Asuntos Exteriores, Augusto Santos Silva.
"Este martes será corrixido este equívoco manifesto", e "volvemos á xestión normal da fronteira común, con coordinación permanente e armoniosa entre os dous gobernos", sinalou en declaracións a medios locais.
A circulación na fronteira común "non estará suxeita á presentación dun test negativo de covid", insistiu o titular luso de Exteriores.
España e Portugal manteñen a esixencia de PCRs negativos para viaxes aéreas ou marítimas pero non para cruzar a fronteira común.
O Goberno luso ameazou o luns con medidas "recíprocas" se España mantiña a Portugal na lista de países aos que se esixen probas diagnósticas sobre covid para entrar en territorio español por vía terrestre.
A fronteira entre España e Portugal reabriu o pasado 1 de maio e desde entón non había ningunha limitación á circulación en ambos os sentidos.
