O PP gañaría as próximas eleccións xerais co 28,4% dos votos fronte ao 26,9% do PSOE, unha subida atribuíble ao efecto Feijóo que, no entanto, non sería suficiente para que o novo líder dos populares chegase á Moncloa, para o que necesitaría o apoio de Vox.
Segundo unha enquisa que este luns publica El Periódico de Catalunya, o PP subiría 33 escanos e situaríase nunha pinza de entre 118 e 121 (ten 89), mentres que o PSOE, que na actualidade conta con 120 deputados, quedaría con entre 107 e 110.
O Barómetro Político de España do Gabinet d'Estudis Socials i Opinió Pública (GESOP), que se elaborou entre os pasados 4 e 6 de abril en base a mil entrevistas, reflicte a tendencia á alza de Vox, ao que outorga entre 54 e 56 escanos (ten 52), e a caída de Unidas Podemos desde as súas 35 deputados actuais a entre 26 e 28, así como o mantemento de ERC ao redor dos 12-13 asentos (ten 13).
A sondaxe sitúa así mesmo a Alberto Núñez Feijóo como o líder mellor valorado, cunha puntuación de 5,2 sobre 10, moi superior ao 3,2 que obtivo o anterior candidato popular, Pablo Casado, na enquisa do pasado mes de febreiro.
Tras Feijóo, aparecen Yolanda Díaz (4,9); Pedro Sánchez (4,2); Íñigo Errejón (4,1); Inés Arrimadas (3,8) e Santiago Abascal (2,8).
